كەزەكتى سوت پروتسەسىندە كۋاگەر وبلىستىق حالىق شىعارماشىلىعى ورتالىعىنىڭ ديرەكتورى جانىبەك امانيازوۆ پروكۋرور لاۋرا اسانوۆا جولداعان ساۋالدارعا جاۋاپ بەردى.
«2021-جىلدىڭ 10- جەلتوقسانى كۇنى اقىلبەك رىسقاليەۆ تۇسكە دەيىن تەلەفون سوعىپ، «ىشتە بولىڭىز» دەدى. ءبىراق، ءوزى ماعان بەسكە جاقىن كەلدى. كابينەتتەگى بەينەكامەراعا قاراپ ءبىراز تۇردى، جۇمىسقا قاتىستى ءتۇرلى سۇراق قويدى. ءسويتتى دە قول سومكەسىنىڭ ىشىنەن ءبىر پاكەتتى الىپ، قاسىما قويىپ، ونى وبلىس اكىمىنىڭ سول كەزدەگى ورىنباسارى باقىتگۇل حامەنوۆاعا اپارىپ بەرۋىمدى سۇرادى. تۇسىنبەگەن بولىپ، «باقىتگۇل قايىرجان قىزىنا ما» دەپ سۇراپ ەدىم، «ءيا» دەدى. ودان سوڭ اقىلبەك رىسقاليەۆتى شىعارىپ سالماق بولىپ تومەنگى قاتارعا ءتۇستىم. سىرتقا شىعا بەرە الدىمنان سىبايلاس جەمقورلىقپەن كۇرەس اگەنتتىگىنىڭ جىگىتتەرى شىعىپ مەنى جوعارىداعى كابينەتىمە الىپ كەلدى جانە ماعان ءتىنتۋ جۇرگىزەتىندەرىن ايتتى. كەيىن بىلگەنىمدەي، الگى پاكەتتە 2 ميلليون جارىم تەڭگە اقشا بار ەكەن. باسىندا ونى بىلگەنىم جوق قوي، پاكەتتە نە بار ەكەنىن دە سۇرامادىم. ال، كوزىمشە الگىنىڭ ىشىنەن اقشانى شىعارعاندا، بەينەكامەراعا قاراپ، «بۇل ارانداتۋ» دەپ ايتقانىم راس»، - دەيدى وبلىستىق مادەنيەت باسقارماسىنا قاراستى و ح ش و ديرەكتورى جانىبەك امانيازوۆ.
سول كۇنى باقىتگۇل حامەنوۆا دا و ح ش و باسشىسىنىڭ WhatsApp جەلىسىنە جازىپ، وزىنە كەلىپ كەتۋىن سۇراعان. الايدا، جانىبەك امانيازوۆ مادەني شارالارعا اقىلداسۋ ماقساتىندا بۇنداي شاقىرتۋلار بولىپ تۇراتىنىن ايتتى.
جانىبەك امانيازوۆ اڭگىمە اراسىندا ءوزىنىڭ تىكەلەي باسشىسى اقىلبەك رىسقاليەۆتىڭ بۇعان دەيىن ءبىر رەت ەشقانداي سەبەپسىز اقشا سۇراعانىن جانە وعان وبلىس اكىمىنىڭ بۇرىنعى ورىنباسارى باقىتگۇل حامەنوۆا جۇمساپ وتىر دەگەنىن جەتكىزدى.
«ءبىر كۇنى مەنەن وبلىستىق مادەنيەت باسقارماسىنىڭ بۇرىنعى باسشىسى اقىلبەك رىسقاليەۆ حامەنوۆانىڭ تاپسىرماسى دەپ 200 مىڭ تەڭگە اقشا سۇرادى. كەيىن باقىتگۇل قايىرجان قىزىنا ارنايى بارىپ بولعان جايتتى جەتكىزگەنمىن. ول ەشقانداي دا اقشا سۇراماعانىن ايتىپ، «ەگەر وسىنداي جاعداي تاعى دا قايتالاناتىن بولسا، وزىمە حابارلا» دەگەن ەدى»، - دەيدى جانىبەك امانيازوۆ.
اقىلبەك رىسقاليەۆتىڭ ادۆوكاتى كۋاگەردىڭ كەيبىر سوزدەرىمەن كەلىسپەيتىنىن اتاپ، ءتىپتى كەي سوزدەرى باستاپقى پىكىرىنە قايشى كەلدى دەگەن ءۋاجىن ءبىلدىردى.
وعان جاۋاپ بەرگەن كۋاگەر ارادا ءبىرشاما ۋاقىت وتكەندىكتەن، كەيبىر ساتتەردى ۇمىتىڭقىراپ قالعانىن جاسىرمادى.
ودان بولەك، بىلتىر وتكەن «ۇلىق ۇلىس - التىن وردا» اتتى رەسپۋبليكالىق كونفەرەنسياعا وبلىستىق حالىق شىعارماشىلىعى ورتالىعى جۇمساعان 33 ميلليون تەڭگە دە ءسوز بولدى.
جانىبەك امانيازوۆ ونىڭ مەملەكەتتەن بولىنگەن قارجى ەكەنىن جانە تولىقتاي يگەرىلگەنىن اتاپ ءوتتى.