احمەت بايتۇرسىن ۇلى تۇسكەن بەينەتاسپا تابىلدى

نۇر- سۇلتان. قازاقپارات - الاشقا ءسۇيىنشى حابار! ۇلت ۇستازى احمەت بايتۇرسىن ۇلى تۇسكەن بەينەتاسپا تابىلدى. تاريحي جادىگەر ازەربايجاننىڭ استاناسى باكۋدىڭ مۇراعاتىندا ساقتالعان.

تەك ۆيدەوداعى ادامنىڭ كىم ەكەنى جازىلماعان. ءبىراق سىرت كەلبەتىنە قاراپ عالىمدار ونىڭ احمەت بايتۇرسىنوۆ ەكەنىنە شەك كەلتىرمەيدى.

ۆيدەونى «احاڭ ءجۇرىپ وتكەن جولمەن» ەكسپەديتسياسىنىڭ مۇشەلەرى جاريالادى. بۇل بەينەماتەريال 1926 -جىلى باكۋدە تۇسىرىلگەن. سول جىلى مۇندا بۇكىلوداقتىق تۇركولوگتاردىڭ ءبىرىنشى قۇرىلتايى وتكەن ەدى. كەلەلى كەڭەسكە قازاق جەرىنەن 4 دەلەگات قاتىستى. ولار احمەت بايتۇرسىنوۆ، ەلدەس وماروۆ، ءبىلال سۇلەيوۆ جانە ءنازىر تورەقۇلوۆ.

سودان ۋاقىت سالىپ، احاڭ جۇرگەن جولمەن قازىرگىنىڭ عالىمدارى دا ءجۇرىپ ءوتتى. اقىرى مۇراعاتتى اقتارىپ، مول اقپارات جيناعان ماماندار سول كەڭەستە تۇسىرىلگەن بەينەماتەريالعا قول جەتكىزدى. الداعى ۋاقىتتا ەكسپەديتسيا مۇشەلەرى دەرەكتى رەسمي راستاۋ ءۇشىن ساراپتامالىق ورتالىقتارعا جۇگىنبەك.

ابىلاي ماۋدانوۆ، «احاڭ ءجۇرىپ وتكەن جولمەن» ەكسپەديتسياسىنىڭ مۇشەسى:

- بىردەن ايتۋ كەرەك ۆيدەو اسا انىق ەمەس. ءبىراق الاشتانۋشى عالىمدار، احاڭ تانۋشى عالىمدار مۇنى ءبىر اۋىزدان احاڭ دەپ سەنىممەن ايتىپ وتىر. نەگە؟ سەبەبى، سول جيىندا احاڭ قۇرىلتايدا ەكى بىردەي كوميسسياعا جەتەكشى بولعان ەكەن. مىناۋ پرەزيديۋمدا ول كوميسسيا مۇشەلەرى وتىرادى. احاڭ ءبىرىنشى وتىرادى. سوندىقتان وتىرعان ورنى احاڭ وتىرۋعا ءتيىستى ورىن. ەكىنشى سول كەزەڭدەگى تۇسكەن فوتولارىمەن جاڭاعى ۆيدەو سايكەس كەلەدى.

www.24.kz