ماسكەۋدە احمەت بايتۇرسىن ۇلىنىڭ عىلىم مەن قوعامدى دامىتۋعا قوسقان ۇلەسى تالقىلاندى
دوڭگەلەك ۇستەلدىڭ شىمىلدىعىن اشقان ءال-فارابي اتىنداعى قاز ۇ ۋ حالىقارالىق قاتىناستار ماگيسترى باعداد ءالىمحان قىزى احمەت بايتۇرسىن ۇلى مۇرالارى مەن ەڭبەكتەرىن ساقتاۋدىڭ ماڭىزىن اتاپ ءوتتى.
«ونىڭ باعا جەتپەس قۇندى مۇرالارى ءبىزدىڭ جادىمىزدا جانە جۇرەگىمىزدە ماڭگى ساقتالادى. بۇل - تەك مىندەت قانا ەمەس، سونىمەن قاتار ءارقايسىمىز ءۇشىن جوعارى قۇرمەت. بۇگىن ءبىز تاريحىمىزدا تەرەڭ ءىز قالدىرعان كورنەكتى قايراتكەرلەردىڭ ءبىرى احمەت بايتۇرسىن ۇلىنىڭ تۋعانىنا 150 جىل تولۋىن اتاپ وتۋدەمىز»، - دەدى ب. ءالىمحان قىزى.
رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ دوتسەنتى تالعات مىقتىبايەۆ احمەت بايتۇرسىن ۇلىنىڭ پەداگوگيكا، ادەبيەت جانە ساياسي قىزمەتتىڭ دامۋىنا قوسقان زور ۇلەسىن اتاپ ءوتتى.
«بۇگىن ءبىز قازاق ءالىپبيىن جاساۋشىنىڭ مۇراسىن جان- جاقتى قاراستىردىق، ونىڭ ءبىرقاتار شىعارمالارىن وقىدىق. ونىڭ ادەبيەتتەگى «اباي تانۋ» دەپ اتالاتىن باعىتتىڭ نەگىزىن قالاۋشى بولعانىن ۇمىتپاۋىمىز كەرەك. ول العاشقىلاردىڭ ءبىرى بولىپ ابايدىڭ فيلوسوف، اعارتۋشى رەتىندەگى مارتەبەسىن كوتەردى»، - دەپ اتاپ ءوتتى عالىم.
ت. مىقتىبايەۆ رەسەيدەگى قازاق دياسپوراسىنىڭ وكىلدەرى بايتۇرسىن ۇلىن ەسكە الۋعا ارنالعان ءىس- شارالاردى تۇراقتى تۇردە وتكىزىپ تۇراتىنىن ايتتى.
«جاقىندا ءبىز قازاق اعارتۋشىسىنىڭ ۇرپاقتارىمەن جانە جەرلەستەرىمەن كەزدەسىپ، ونىڭ رەسەيدە بولعان كەزەڭىن زەرتتەۋگە كومەكتەستىك. سونىمەن قاتار ءبىز احمەت بايتۇرسىن ۇلىن ەسكە الۋعا ارنالعان شىعارماشىلىق كەش وتكىزدىك، سونداي- اق ونىڭ اعارتۋشىلىق يدەيالارىن شەتەلدە دارىپتەۋگە تىرىسامىز»، - دەدى ول.
ءىس-شارا بارىسىندا قاتىسۋشىلار كورنەكتى اعارتۋشىنىڭ ءومىربايانىنان الىنعان قىزىقتى دەرەكتەرمەن ءبولىستى، ونىڭ ءومىرى مەن قىزمەتى تۋرالى دەرەكتى فيلمدى تاماشالادى.
سونداي-اق قازىرگى قازاق ءتىلىنىڭ، جازۋدىڭ دامۋىنداعى اعارتۋشىنىڭ ءرولىن جانە ونىڭ ءوز ەلىنىڭ ساياسي جانە مادەني ومىرىندەگى ىقپالىن تالقىلادى.