ۇلتتىق بانك وكىلى دوللار باعامىنا بولجام جاسادى

نۇر- سۇلتان. قازاقپارات - ا ق ش دوللارى باعامىنىڭ قارقىنى فەدەرالدى رەزەرۆ جۇيەسىنىڭ مالىمدەمەسىنە وراي وزگەرەدى. بۇل تۋرالى ۇلتتىق بانك ءتوراعاسىنىڭ ورىنباسارى ءاليا مولدابەكوۆا ايتتى، دەپ حابارلايدى قازاقپارات ءتىلشىسى.

«ا ق ش دوللارى مەن ەۋرونىڭ باعامىنا ءبىرقاتار فاكتور ىقپال ەتەتىنى تۇسىنكتى. ولاردىڭ اراسىندا نەگىزگىسى فەدەرالدى رەزەرۆ جۇيەسىنىڭ (ف ر ج) ساياساتىنا قاتىستى. بۇعان دەيىن بىرنەشە رەت ا ق ش- تىڭ فەدەرالدى رەزەرۆ جۇيەسى ينفلياتسيامەن كۇرەس اياسىندا بازالىق مولشەرلەمەنى ارى قاراي كوتەرەتىنى جايىندا مالىمدەگەن ەدى. بۇل ءوز كەزەگىندە ۆاليۋتا نارىعىنداعى احۋالعا ايتارلىقتاي اسەر ەتىپ وتىر»، - دەدى ءا. مولدابەكوۆا ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، ف ر ج مولشەرلەمەسىنىڭ ارتۋى دوللاردىڭ نىعايۋىنا الىپ كەلەدى. بۇل تۇرعىدا دامىعان جانە دامۋشى ەلدەردىڭ ۆاليۋتالارى، سونىڭ اراسىندا ەۋرو باعامى قۇبىلمالى بولادى. سونىڭ سالدارىنان بۇل ۆاليۋتالار دوللارعا قاراعاندا السىرەپ وتىر.

«ا ق ش دوللارى، ەۋرو جانە باسقا دا ۆاليۋتالار باعامىنىڭ الداعى قارقىنى فەدەرالدى رەزەرۆ جۇيەسىنىڭ مالىمدەمەسىنە، سونداي- اق پايىز مولشەرلەمەسىن كوتەرۋ قارقىنىنا وراي وزگەرەدى»، - دەدى ۇ ب باسشىسىنىڭ ورىنباسارى.

فەدەرالدى رەزەرۆ جۇيەسى قاتاڭ مونەتارلى ساياساتتى ۇستانىپ وتىرعانىنا توقتالعان ول: «سوندىقتان نارىققا قاتىسۋشىلاردىڭ كوبىسى ا ق ش دوللارى ارى قاراي نىعايا تۇسەدى دەگەن بولجام ايتىپ وتىر»، - دەدى.