احمەتتىڭ جارى بادريسافا مۇسىلمان ءدىنىن قالاي قابىلدادى

نۇر-سۇلتان. قازاقپارات - احمەت بايتۇرسىن ۇلى مەن جارى بادريسافا مۇحامەدسادىق قىزىنىڭ كوڭىل جاراستىرىپ، نەكەلەسۋى تۋرالى اڭىز بەن ءافسانا كوپ.

ونىڭ بىرىندە الاش ارداقتىسىنىڭ «جەتىم قىز» الەكساندراعا جانى اشىپ ۇيلەنگەنى ايتىلسا، تاعى ءبىر اڭىز ەكەۋىنىڭ اراسىندا ىڭكار سەزىمنىڭ ۇشقىنى بولعانىن مەڭزەيدى.

بايتۇرسىن اۋلەتىمەن بىرگە الماتىداعى مۋزەي-ءۇيدىڭ قۇرىلۋىنا جىلدار بويى اتسالىسقان، قازىر سوعان جەتەكشىلىك ەتىپ وتىرعان احمەتتانۋشى رايحان يماحانبەت قازاقپارات تىلشىسىنە ەسكىدەن جەتكەن ەستى اڭگىمەنى بايانداعان ەدى.

احمەتتىڭ كوزىن كورگەن زامانداسى، رۋحاني شاكىرتى مەرەيتويعا جازعان ەستەلىگىنىڭ ىشىندە «احمەت بايتۇرسىن ۇلى اۋليەكولگە ەكىنشى رەت مۇعالىم بولىپ باردى» دەگەن سويلەم بار. ول جەر قوستاناي قالاسىنان 100 شاقىرىمدا جاتىر. احمەت بايتۇرسىن ۇلى سول جەردە اۋەلى تاجىريبەدەن ءوتىپ، كەيىننەن قايتا اينالىپ سوققان. وسى جەردە بولاشاق جارى ادەكساندرا يۆانوۆنامەن تانىسقان. احمەت ساباق بەرگەن مەكتەپتە الەكساندرا دا باستاۋىش سىنىپتارعا ساباق بەرگەن ەكەن. ەكەۋىنىڭ قۇرمەتىنە ءبىر كولدى مۇعالىمكول اتاندىرعان. ول جەردە جەتى كول بار. سونىڭ ىشىندە مۇعالىمكول احمەت ساباق بەرگەن مەكتەپتىڭ ىرگەسىندە عانا جاتىر. ول عيماراتتىڭ قابىرعاسى ءالى بار»، - دەيدى مۋزەي جەتەكشىسى.

احمەت تانۋشى الەكساندرا مەن احمەت بايتۇرسىن ۇلىنىڭ اراسىندا ىڭكار سەزىم بولماسا، كولگە مۇعالىمكول اتاۋى بەرىلمەس ەدى دەپ توپشىلايدى.

«احمەت بايتۇرسىن ۇلى سول جەردەگى مۇحامەدسادىق دەگەن تاتاردىڭ ۇيىنەن پاتەر جالدايدى. الگى تاتاردىڭ بادريسافا دەگەن قىزى بولادى. باليعات جاسىنا تولار شاعىندا ول قىزى اۋىرىپ قايتىس بولادى دا، مۇحامەدسادىق احمەتتىڭ بولاشاق جارىنا ءوز قىزىنىڭ قۇجاتىن بەرەدى. احمەت پەن الەكساندرا قوستانايداعى ءبىر مەشىتكە بارادى. وكىنىشكە قاراي، ونداعىلار مۇنى قولدامايدى. اقىرى ولار ترويتسكىگە بارىپ، نەكەلەرىن سوندا قيعىزادى. الەكساندرا، مىنە وسى كەزدەن باستاپ بادريسافا بايتۇرسىنوۆا بولىپ جازىلادى. ەكەۋىنىڭ نەكەسى تالاپقا ساي بولۋى ءۇشىن بادريسافا تاتار مەشىتىندە ءۇش اي مۇسىلماندىق مەكتەپتەن وتكەن. قۇجاتتا ۇلتىنىڭ تۇسىنا تاتار دەپ جازدىرعان. ويتكەنى ءتۇرى قازاققا ۇقساماعان»، - دەيدى احمەتتانۋشى.

احمەت بايتۇرسىن ۇلىنىڭ وتباسىلىق جاعدايىن كەزىندە بەتىنە سالىق ەتىپ باسقىسى كەلگەندەر بولعان كورىنەدى.

«احمەتتى كەكەتكىسى كەلگەن كىسىلەر «اكەڭ مەن اعالارىڭدى ايداۋعا جىبەرگەن ورىستىڭ قىزىن ەلگە نەگە اكەلدىڭ» دەپ سۇرايتىن كورىنەدى.

سۇراساڭىز، ەسىمى - الەكساندرا يۆانوۆنا،

ريزامىن قۇدايدىڭ ونى ماعان قيعانىنا.

ءبىر كاپىردى مۇسىلمان عىپ ساۋاپتانسام،

تۇرماي ما، ون مولدانىڭ يمانىنا»، - دەپ ولەڭمەن جاۋاپ بەرگەن ەكەن»، - دەيدى رايحان يماحانبەت.

ايتا كەتەيىك، 5- قىركۇيەكتە احمەت بايتۇرسىن ۇلىنىڭ دۇنيەگە كەلگەنىنە 150 جىل تولدى.