«قوستاناي وبلىسىندا الاپات ءورت بولىپ جاتىر. بۇل جاعداي تۇرعىنداردىڭ ءومىرى مەن دەنساۋلىعىنا جانە ەلدى مەكەندەرگە قاۋىپ توندىرەدى. ءوڭىردىڭ ەكونوميكاسى مەن تابيعاتىنا زور شىعىن كەلىپ وتىر. ءورت 4 اۋدان اۋماعىنا جايىلدى، تاعى 5 وبىلستا - اقتوبە، تۇركىستان، قاراعاندى، شىعىس قازاقستان، اقمولادا ءورت وشاقتارى پايدا بولىپ جاتىر»، - دەدى پرەزيدەنت.
ونىڭ ايتۋىنشا، كۇننىڭ ىستىق بولىپ، جەلدىڭ كۇشەيۋى ءورتتى ودان ءارى ءورشىتتى.
«ماسەلەنىڭ اسا كۇردەلى ەكەنى تۇسىنىكتى. سوندىقتان ۇكىمەت پەن پرەزيدەنت اكىمشىلىگىنە ءتيىستى تاپسىرمالار بەردىم. ءورتتى توقتاتۋ ءۇشىن قاجەتتى شارالار قابىلداندى. وسىعان وراي، بارلىق رەسۋرستى دەرەۋ جۇمىلدىردىق. قوستاناي وبلىسىنا باسقا ايماقتاردان تەحنيكا مەن قاجەتتى ماماندار ۋاقىتىلى جەتكىزىلدى. توتەنشە جاعداي مينيسترلىگىنە ىشكى ىستەر جانە قورعانىس مينيسترلىكتەرى، ۇلتتىق ۇلان كومەككە كەلدى. بۇل جۇمىسقا ورمان شارۋاشىلىعى مەن ورمان كۇزەتىنىڭ جۇمىسشىلارى جانە تەمىرجولشىلار تارتىلدى. قازىر توتەنشە جاعداي باقىلاۋعا الىندى. ءورت بولعان اۋىل تۇرعىندارى قاۋىپسىز جەرگە كوشىرىلدى»، - دەدى مەملەكەت باسشىسى.
ايتا كەتەيىك، قوستانايداعى الاپات ءورت ءۇشىنشى تاۋلىككە سوزىلدى . قازىرگى ۋاقىتتا جالپى اۋدانى 43 مىڭ گەكتاردان اسقان ءتىلسىز جاۋدى اۋىزدىقتاۋعا 2193 ادام، 224 بىرلىك تەحنيكا، 7 اۋە كەمەسى، 5 ءورت ءسوندىرۋ پويىزى جۇمىلدىرىلدى.
ءبىر مەزەتتە 3 اۋماقتا تابيعي ءورت ءسوندىرىلىپ جاتىر - قارابالىق، ۇزىنكول جانە اۋليەكول اۋداندارىندا.
پرەزيدەنت ۇيلەرىن تاستاپ كەتۋگە ءماجبۇر بولعان ادامدارعا تولىققاندى قولداۋ كورسەتۋدىڭ ماڭىزدى ەكەنىن اتاپ ءوتتى . ۇكىمەت پەن قوستاناي وبلىسىنىڭ اكىمدىگىنە زارداپ شەككەن تۇرعىندارعا شۇعىل تۇردە وتەماقى تولەۋ ماسەلەسىن قامتاماسىز ەتۋ تاپسىرىلدى.
سونىمەن بىرگە، توتەنشە جاعدايدى جويۋعا اتسالىسقان بارلىق ازاماتتىڭ جاساعان ەرلىگى ءۇشىن العىس ءبىلدىرىپ، ولار ناگرادالار مەن سىيلىقتارعا ۇسىنىلاتىنىن ايتتى.