كەمبريدج ۋنيۆەرسيتەتى احمەت بايتۇرسىن ۇلىنىڭ رەفورماسىنا نەگە قىزىقتى

نۇر-سۇلتان. قازاقپارات - انگليانىڭ كەمبريدج ۋنيۆەرسيتەتى قازاق عالىمى ايگۇل ءىسماقوۆانى احمەت بايتۇرسىن ۇلىنىڭ ءتىل بىلىمىنە جاساعان رەفوماسى تۋرالى ءدارىس وقۋعا شاقىرعان ەكەن.

م. اۋەزوۆ اتىنداعى ادەبيەت جانە ونەر ينستيتۋتىنىڭ پروفەسسورى، احمەتتانۋشى عالىم قازاقپارات تىلشىسىنە بۇل شاقىرۋدىڭ استارىندا قانداي ماقسات جاتقانىن ءتۇسىندىردى.

«احمەت بايتۇرسىن ۇلى لينگۆيستيكادا توڭكەرىس جاساعان ەكەن. سول رەفورماسىن بىزگە تۇسىندىرەتىن ادام جوق»، - دەپ ۇسىنىس ايتتى ول تاراپتان. قۇداي قالاسا، مەن سول جەردە ءدارىس بەرەمىن. ولار سونى جازىپ الادى. احاڭ مەرەيتويىنىڭ ءدۇبىرىن، ونىڭ ءتىل بىلىمىندەگى رەفورماسى تۋرالى مالىمەتتەردى ەۋروپاعا جەتكىزۋدىڭ ءبىر جولى سول بولماق»، - دەيدى عالىم.

كەمبريدج ۋنيۆەرسيتەتى قازاق عالىمىنا نازاربايەۆ ۋنيۆەرسيتەتى ارقىلى شىققان ەكەن. ايگۇل ءىسماقوۆا اتالعان ۋنيۆەرسيتەتتە ءدارىس وقيدى. سونداعى شەتەلدىك ارىپتەستەرى احمەتتىڭ عىلىمداعى توڭكەرىسىن باتىس تا ءبىلۋى كەرەك دەپ ۇيعارسا كەرەك. انگلياداعى ءدارىس قىركۇيەك ايىنا جوسپارلانعان. ياعني، ا. بايتۇرسىن ۇلىنىڭ ەڭبەكتەرىن جيناقتاپ، بىرنەشە رەت باسپاعا ۇسىنعان قازاق عالىمىنىڭ كەمبريدجدەگى ءدارىسى الاش ارداقتىسىنىڭ 150 جىلدىق مەرەيتويىنا سايكەس كەلىپ وتىر دەگەن ءسوز.

ايتا كەتەيىك، 5-قىركۇيەكتە، احمەت بايتۇرسىن ۇلىنىڭ دۇنيەگە كەلگەنىنە 150 جىل تولادى.

ايگۇل ءىسماقوۆانىڭ ا. بايتۇرسىن ۇلى مۇراسى مەن قازاق ءتىلىنىڭ قازىرگى پروبلەماسى تۋرالى ويىن الداعى كۇندەرى سايتىمىزعا جاريالاناتىن سۇحباتتان وقي الاسىزدار.