بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.
«مەملەكەت باسشىسى 2022 -جىلعى 1- قىركۇيەكتەگى قازاقستان حالقىنا جولداۋىندا دەنساۋلىق ساقتاۋ سالاسىنا قارجىنىڭ جەتكىلىكتى بولىنبەۋى قالىپتى جاعدايعا اينالعانىن، سونىڭ كەسىرىنەن ازاماتتار ساقتاندىرۋ جۇيەسىنە قوسىلسا دا ولارعا مەديتسينالىق قىزمەتتەردى تولىق كولەمدە كورسەتىلمەي وتىرعانىن اتاپ ءوتتى. سالانى قارجىلاندىرۋ تاسىلدەرىن قايتا قاراپ، ءبىز مىناداي ءىس- شارالاردى: تەگىن مەديتسينالىق كومەكتىڭ كەپىلدىك بەرىلگەن كولەمىنىڭ شىعىستارىن جانە حالىقتىڭ 15 جەڭىلدىكتى ساناتى ءۇشىن مەملەكەتتىڭ مەديتسينالىق ساقتاندىرۋ جۇيەسىنە اۋداراتىن جارنالارىن قوسىمشا قارجىلاندىرۋ ماسەلەسىن پىسىقتاۋ، قاراجاتتى اكىمشىلەندىرۋدى وڭايلاتۋ جانە ونى ءتيىمدى پايدالانۋ ءۇشىن تەگىن مەديتسينالىق كومەكتىڭ كەپىلدىك بەرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ جۇيەسى پاكەتتەرىنىڭ قارجىلىق شىعىنىن بىرىكتىرۋدى زاڭ بويىنشا رەتتەۋ ىسكە اسىرۋدى جوسپارلاپ وتىرمىز»، - دەدى ول.
ءمينيستردىڭ ايتۋىنشا، مىندەتتى الەۋمەتتىك مەديتسينالىق ساقتاندىرۋ جۇيەسىمەن بىرگە ەرىكتى مەديتسينالىق ساقتاندىرۋدى تولىق ىسكە قوسۋ ءۇشىن مەديتسينالىق كومەكتىڭ باعىتتارى، ەرىكتى مەديتسينالىق ساقتاندىرۋ قاراجاتىمەن جابىلاتىن قىزمەتتەردىڭ تىزبەسى ايقىندالاتىن بولادى.
«سونداي- اق، شەتەلدىكتەر، اتاپ ايتقاندا، ەڭبەك ميگرانتتارى مەن شەتەلدىك ستۋدەنتتەر ءۇشىن جۇكتەلگەن مەديتسينالىق ساقتاندىرۋ زاڭناما بويىنشا بەكىتىلەدى جانە ىسكە اسىرىلادى»، - دەدى اجار عينيات.
فوتو: primeminister.kz
اۆتور
مارلان جيەمباي