قازاقستاندا زەينەتاقى قالاي، قاشان وسەدى؟
ۆەدومستۆو مالىمەتىنشە، قاسىم-جومارت توقايەۆتىڭ 1- قىركۇيەكتەگى قازاقستان حالقىنا جولداۋىندا زەينەتاقى جۇيەسىنىڭ تيىمدىلىگىن ارتتىرۋ بويىنشا جاڭا شارالار ۇسىنىلعان. الەۋمەتتىك كودەكس جوباسى شەڭبەرىندە بازالىق زەينەتاقى مولشەرىن ارتتىرۋ جانە ىنتىماقتى زەينەتاقىنى ەسەپتەۋ ءۇشىن ەڭ جوعارى تابىستى ۇلعايتۋ كوزدەلەدى. بۇل وسىعان دەيىن قابىلدانعان شەشىمدەرگە قوسا، 2025-جىلعا قاراي جيىنتىق زەينەتاقىنى ورتا ەسەپپەن 27 پايىزعا ارتتىرۋعا مۇمكىندىك بەرەدى.
قازاقستاندا بازالىق جانە ورتاق زەينەتاقىنى، سونداي-اق، ب ج ز ق- دان تولەنەتىن زەينەتاقى تولەمىن (جۇمىسكەردىڭ زەينەتاقى جيناقتارى ەسەبىنەن وتەلەدى) قامتيتىن كوپ دەڭگەيلى زەينەتاقى جۇيەسى قالىپتاستى.
ىنتىماقتى زەينەتاقى جۇيەسى بىرتىندەپ قىسقارىپ جاتىر، ويتكەنى ونى تاعايىنداۋ كەزىندە 1998-جىلعى 1- قاڭتارعا دەيىنگى، ياعني جيناقتاۋشى جۇيە ەنگىزىلگەنگە دەيىن ازىرلەنگەن ەڭبەك ءوتىلى ەسكەرىلەدى.
ەڭبەك مينيسترلىگى دەرەكتەرى بويىنشا، زەينەتاقى جۇيەسىنىڭ تيىمدىلىگىن ارتتىرۋ جانە ازاماتتاردى زەينەتاقى مولشەرىمەن قامتاماسىز ەتۋ ءۇشىن الەۋمەتتىك كودەكس جوباسى شەڭبەرىندە ءبىرقاتار وزگەرىس ەنگىزۋ جوسپارلانىپ وتىر.
«ءبىرىنشى. 2023-جىلدان باستاپ 2027-جىلعا دەيىنگى كەزەڭدە ەڭ تومەنگى بازالىق زەينەتاقى مولشەرىن كەزەڭ-كەزەڭىمەن ەڭ تومەنگى كۇنكورىس دەڭگەيى شاماسىنان، 54 تەن 70 پايىزعا دەيىن، ەڭ جوعارى زەينەتاقىنى 100 دەن 120 پايىزعا دەيىن جەتكىزۋ كوزدەلەدى.
وسى كەزەڭدە بازالىق زەينەتاقى مولشەرى ورتا ەسەپپەن 51 پايىزعا دەيىن وسەدى. بازالىق زەينەتاقىنىڭ ورتاشا مولشەرىنىڭ جىل سايىنعى ءوسۋى شامامەن 13 پايىز بولادى جانە بۇل 2 ميلليون زەينەتكەرگە قاتىستى.
ەكىنشى. 2023-جىلعى 1- قاڭتاردان باستاپ زەينەتكە شىعاتىن ازاماتتار ءۇشىن ىنتىماقتى زەينەتاقىنى ەسەپتەۋ ءۇشىن پايدالانىلاتىن ەڭ جوعارى تابىس كولەمىن 46 دان 55 ايلىق ەسەپتىك كورسەتكىشكە دەيىن ارتتىرۋ كوزدەلگەن»، - دەدى مينيسترلىك وكىلى.
ۇسىنىلىپ وتىرعان شارالار 2025-جىلعا قاراي جيىنتىق زەينەتاقىنى ورتا ەسەپپەن 27 پايىزعا (ءۇش جىل ىشىندە – 109 دان 138 مىڭ تەڭگەگە دەيىن) ارتتىرۋعا جانە جيىنتىق زەينەتاقىداعى مەملەكەتتىك تولەمنىڭ ۇلەس سالماعىن ارتتىرۋعا مۇمكىندىك بەرەدى.
«وسىلايشا، مەملەكەت زەينەتكەرلەر اراسىندا كەدەيلىكتىڭ وسۋىنە جول بەرمەۋ بويىنشا مىندەتتەمەلەر قابىلدايدى»، - دەپ قورىتىندىلادى ۆەدومستۆو وكىلى.
ەسكە سالايىق، بۇعان دەيىن پرەزيدەنت ايەلدەردىڭ زەينەت جاسى 2028-جىلعا دەيىن وسپەيتىنىن مالىمدەگەنى حابارلانعان بولاتىن.