قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ لاۋرەاتى ارمان قاني 1954 -جىلى 22 - اقپاندا پاۆلودار قالاسىندا دۇنيەگە كەلگەن.
اتاسى قاني - ارقانىڭ ايگىلى كۇرەسكەر اقىنى ماديمەن اعايىن، اجەسى كاسىپ - ءۇش جۇزگە اتى ءمالىم جاياۋ مۇسانىڭ قىزى. ارمان بالا كەزىنەن باستاپ ءوز جۇرتى مەن ناعاشى جۇرتىنداعى سول ەكى اقىننىڭ ءومىرى مەن ونەرىن ونەگە تۇتىپ وسكەن.
1969 -جىلى ءوزى وقيتىن №3 مەكتەپ- ينتەرناتتا ۇلتشىل جاسوسپىرىمدەردىڭ «جاس ۇلان» اتتى جاسىرىن ساياسي ۇيىمىن قۇرىپ، جۇرتشىلىقتى وتارشىلدىققا قارسى باس كوتەرۋگە شاقىرعان ءۇنپاراقتار تاراتىپ، ولەڭدەر جازعان. مەملەكەتتىك قاۋىپسىزدىك كوميتەتى (م ق ك) وبلىستىق باسقارماسى ۇيىمدى اشكەرەلەگەن سوڭ بىرنەشە سەرىگىمەن بىرگە جازالاۋ شارالارىنا ۇشىراعان: «ۇلتتىق ساياسات ماسەلەلەرىندەگى ورەسكەل قاتەلىكتەرى ءۇشىن» دەگەن ايىپپەن كومسومول قاتارىنان، مەكتەپتەن شىعارىلعان. ءسويتىپ، كامەلەت جاسىنا جەتپەي «ساياسي سەنىمسىز» ادامدار ساناتىنا جاتقىزىلىپ، ءبىلىم الۋ قۇقى مەن باسپا ءسوز بوستاندىعىنا شەكتەۋ قويىلعان. سونىڭ سالدارىنان ۇزاق جىلدار بويى قارا جۇمىس ىستەگەن.
ارمان قاني ورتا مەكتەپتى دە (1976 -جىلى)، جوعارى وقۋ ورنىن دا (پاۆلودار مەملەكەتتىك ۋنيۆەرسيتەتىنىڭ فيلولوگيا فاكۋلتەتى، 1995 -جىلى) ءوز قۇربى- قۇرداستارىنان كوپ كەيىن، سىرتتاي وقىپ تامامداعان. 1990 -جىلداردىڭ باس كەزىنەن بەرى بۇقارالىق اقپارات قۇرالدارىندا جۋرناليستىك قىزمەت اتقاردى.
2005 -جىلى قازاقستان جازۋشىلار وداعىنىڭ مۇشەلىگىنە قابىلدانىپ، 2012 -2020 -جىلدارى جازۋشىلار وداعىنىڭ پاۆلودار وبلىستىق فيليالىنىڭ ديرەكتورى قىزمەتىن اتقاردى.
2012 -جىلدان بەرى قازاقستان جۋرناليستەر وداعىنىڭ مۇشەسى.
قازاقستان جاس اقىندارىنىڭ «قارلىعاش» ۇجىمدىق جىر جيناعىنا ارمان قانيدىڭ 31 ولەڭى ەنگەن (الماتى، «جالىن» - 1984 ج.). «ار الدىندا» (پاۆلودار، «ەكو» - 2001 ج.)، «قىزىل تۇنەكتەگى اق بۇرقاق»، «تامشىلار» (پاۆلودار، «ەكو» - 2004 ج.) «شىندىقپەن بەتپە- بەت» (الماتى، «قازاقپارات» - 2006 ج.)، «جۇلدىزدى تۇمان» (پاۆلودار، «كەرەكۋ» - 2008)، «سەن جانە مەن» (استانا، «فوليانت» - 2012)، «ۇيلەسىم» (پاۆلودار، - 2014)، «باياناۋىل جىرلارى» (پاۆلودار، «پاراسات» - 2014)، «قاراشىعىمداعى بەينەلەر» (پاۆلودار، «ەكو» - 2019 ج)، «كەرەكۋ جىرلارى» (پاۆلودار، «ەكو» - 2020 ج)، «تۋعان جەر توسىندە»، «زامانداستار» (پاۆلودار، «ەكو» - 2021 ج) جيناقتارى جارىق كورگەن.
ماراپاتتارى: «قۇرمەت» وردەنى (2021 ج.)، «قازاقستاننىڭ ەڭبەك سىڭىرگەن قايراتكەرى» (2013 ج)، حالىقارالىق «الاش» ادەبي سىيلىعى» (2016 ج)، «پاۆلودار وبلىسىنا سىڭىرگەن ەڭبەگى ءۇشىن» (2012 ج)، «پاۆلودار قالاسىنىڭ قۇرمەتتى ازاماتى» (2015 ج)، «باياناۋىل اۋدانىنىڭ قۇرمەتتى ازاماتى» (2013 ج)، «ماي اۋدانىنىڭ قۇرمەتتى ازاماتى» (2020 ج) اتاقتارىمەن ماراپاتتالعان.
قوعامدىق- ساياسي ومىردەگى بەلسەندىلىگى ءۇشىن «قازاقستان رەسپۋبليكاسىنىڭ تاۋەلسىزدىگىنە 20 -جىل» (2011ج)، «قازاقستان رەسپۋبليكاسىنىڭ تاۋەلسىزدىگىنە 25 جىل» (2016 ج)، «پاۆلودار وبلىسىنا 75 جىل» (2012 ج)، «قازاق حاندىعىنا 550-جىل» (2015 ج)، «جەلتوقسان وقيعاسىنا 30 جىل» (2016 ج)، «نيەۆادا- سەمەي» قوزعالىسىنا 25 جىل» (2014 ج) مەرەكەلىك مەدالدارى جانە رەسەي لەرمونتوۆ كوميتەتىنىڭ قايسىن قۇليەۆ مەدالى (2019 ج) بەرىلگەن.
سونداي- اق «ءتىل جاناشىرى» قۇرمەت بەلگىسىمەن (2015 ج)، «تاريحي ادىلەتتىك» قوعامدىق كوميتەتتىڭ، حالىقارالىق «قازاق ءتىلى» قوعامىنىڭ العىسحاتتارىمەن ماراپاتتالعان.
اۆتور
عايساعالي سەيتاق