وسى باستاماعا قاتىستى پىكىر بىلدىرگەن ساياساتتانۋىشى سامات نۇرتازا، بۇل جاستاردىڭ الەۋمەتتىك جاعدايىن جاقسارتىپ، اجىراسۋدىڭ ازايۋىنا سەپتىگىن تيگىزەتىنىن ايتتى، دەپ حابارلايدى قازاقپارات ءتىلشىسى.
«ەلىمىزدىڭ ۇلتتىق قورىنىڭ ينۆەستيتسيالىق تابىسىنىڭ 50 پايىزىن 18 جاسقا دەيىنگى بالالارعا تولەۋ قاجەت دەگەن باستاما ورىندى. قازاقستاندا جاستاردىڭ كوبى ءۇيسىز-كۇيسىز. بۇل باستاما، مەنىڭ ويىمشا، جاستاردىڭ باسپانالى بولۋىنا ۇلكەن ءدۇمپۋ بولايىن دەپ تۇر. دالىرەك ايتساق، الەۋمەتتىك جاعدايدىڭ جاقسارۋى مەن اجىراسۋدىڭ ازايۋىنا تىكەلەي اسەر ەتەدى. سونىمەن قاتار، قوعامداعى شيەلەنىسكەن ۇردىستەردى ازايتادى»، - دەدى سامات نۇرتازا.
بۇدان وزگە، ساياساتتانۋشى جولداۋدا كوتەرىلگەن جولداردىڭ ساپاسىن ارتتىرۋ باستاماسى - ەكونوميكانىڭ دامۋىنا سەرپىن بەرەتىنىن اتاپ ءوتتى.
«مەملەكەت باسشىسى اتاعان الەۋمەتتىك ماسەلەنىڭ ءبىرى - 2025-جىلعا دەيىن 95 پايىز اۆتوجول جوندەلەدى. جولدىڭ ماسەلەسىن ءبىر ادامداي سەزىنىپ ءجۇرمىز. تاس جولدار جوندەلسە، جاڭاسى سالىنسا، ەكونوميكا قارقىندى داميدى. ول - ارتەريا. سەبەبى، بارلىق ساۋدا-ساتتىق، ىشكى تاسىمال ءدال وسى تاس جولدارعا بايلانىستى بولىپ وتىر»، - دەپ پىكىر ءبىلدىردى ساياساتتانۋشى.
ەسكە سالايىق، بۇگىن پرەزيدەنت قاسىم-جومارت توقايەۆ قازاقستان حالقىنا جولداۋىن جاريا ەتتى. جولداۋدىڭ نەگىزگى بولىگى ەلىمىزدىڭ الەۋمەتتىك-ەكونوميكالىق دامۋىنا ارنالدى.