وبلىستىق ءبىلىم باسقارماسى باسشىسىنىڭ مىندەتىن اتقارۋشى ايناگۇل دۇيسەكەنوۆانىڭ ايتۋىنشا، 200 مەكتەپتە العاشقى قوڭىراۋ سوعىلادى. ساباققا 140 مىڭعا جۋىق وقۋشى كەلەدى.
«بيىل اتىراۋ قالاسىنداعى 11 مەكتەپتە ساباق ءۇش اۋىسىمدا وتكىزىلەدى. مۇنىڭ بىرنەشە سەبەبى بار. بىرىنشىدەن، شاھار تۇرعىندارىنىڭ اراسىندا دەموگرافيالىق ءوسىم بايقالىپ وتىر. ەكىنشىدەن، بۇعان كوشى-قون قوزعالىسى اسەر ەتەدى. ۇشىنشىدەن، ورىس سىنىپتارىنا ساباق بەرەتىن مۇعالىمدەر جەتىسپەيدى. وڭىردە ءتورت مەكتەپ اپاتتىق جاعدايدا تۇرعانىنا قاراماستان، ءبىلىم بەرۋ قىزمەتىن جالعاستىرادى. مۇنداي ءبىلىم ورداسىنىڭ بىرەۋى اتىراۋ قالاسىندا ورنالاسقان. بۇل مەكتەپتىڭ جاڭا عيماراتىن سالۋ ءۇشىن تەندەر وتكىزىلىپ، كەلىسىمشارتقا قول قويۋ ءجۇرىپ جاتىر. ال اۋىلدارداعى وسىنداي ءۇش مەكتەپ ءۇشىن جاڭا عيماراتتىڭ قۇرىلىسى باستالدى»، - دەيدى ايناگۇل دۇيسەكەنوۆا.
ونىڭ دەرەگىنە سۇيەنسەك، اتىراۋ وبلىسىندا 2021-2025 -جىلدار ارالىعىندا جاڭادان 48 مەكتەپتىڭ عيماراتىن سالۋ جوسپارعا ەنگىزىلگەن. قازىر 10 مەكتەپتىڭ جانە 1 مەكتەپتىڭ جانىنان جاپسارلاس عيمارات قۇرىلىسى ءجۇرىپ جاتىر.
«بيىل 6 مەكتەپتىڭ قۇرىلىسىن جۇرگىزۋگە رەسپۋبليكالىق بيۋدجەت ەسەبىنەن 4 ميلليارد تەڭگە ءبولىندى. جاڭا نىساننىڭ بەسەۋى اتىراۋ قالاسىندا، بىرەۋى يندەر اۋدانىندا سالىنادى. وزگە مەكتەپتەر ءۇشىن جەر تەلىمىن ءبولۋ ماسەلەسى ناقتىلانىپ جاتىر. بۇل مەكتەپتەر پايدالانۋعا بەرىلگەن كەزدە قوسىمشا 20 مىڭعا جۋىق وقۋشى مەكتەپكە قابىلدانىپ، 2 مىڭنان اسا تۇراقتى جۇمىس ورنى اشىلادى»، - دەپ ءمالىم ەتتى ايناگۇل دۇيسەكەنوۆا.