قىرعىز رەسپۋبليكاسى جىل سايىن 31- تامىزدا باستى مەملەكەتتىك مەرەكە - تاۋەلسىزدىك كۇنىن تويلايدى. 1991-جىلدىڭ ءدال وسى كۇنى قىرعىز رەسپۋبليكاسى جوعارعى كەڭەسىنىڭ كەزەكتەن تىس سەسسياسى «قىرعىزستان رەسپۋبليكاسىنىڭ مەملەكەتتىك تاۋەلسىزدىگى دەكلاراتسياسى» قاۋلىسىن قابىلدادى.
وسى تاريحي اكت بويىنشا قىرعىز رەسپۋبليكاسى تاۋەلسىز، ەگەمەن، دەموكراتيالىق مەملەكەت بولىپ جاريالاندى.
شۋ وبلىسىنداعى چۋنكۋرچاك جايلاۋىنداعى كورىكتى جەردە تاۋەلسىزدىك كۇنى قۇرمەتىنە مەملەكەتتىك تۋدى كوتەرۋ راسىمىندە ەل پرەزيدەنتى سادىر جاپاروۆ قىرعىز حالقىنا قۇتتىقتاۋ ءسوز سويلەدى.
سونداي-اق، ول ەلدىڭ ەكولوگيالىق جانە ەنەرگەتيكالىق قاۋىپسىزدىك، حالىقتى الەۋمەتتىك قورعاۋ جۇيەسى، قورعانىس قابىلەتى، تەمىرجول جەلىسىن دامىتۋ، «قۇمتور» التىن كەن ورنىن مەملەكەت مەنشىگىنە قايتارۋ سالاسىنداعى اعىمداعى جىلعى تابىستارىن اتاپ ءوتتى.
ەلدىڭ تۇكپىر-تۇكپىرىندە مەرەكەلىك ءىس-شارالار، بۇقارالىق جيىندار، سپورتتىق جارىستار، اسپازدىق تۋرنير جانە ويىندار ءوتىپ جاتىر.
كەشكە ەل استاناسىنىڭ ورتالىق الا-توو الاڭىندا قىرعىز ەسترادا جۇلدىزدارىنىڭ قاتىسۋىمەن كونسەرت وتەدى.