ونىڭ ەلدە ميلليونداعان قولداۋشىلارى بار. يمام ساياساتتان كەتەتىنىن مالىمدەگەننەن كەيىن ونىڭ جۇزدەگەن قولداۋشىلارى باعداتتىڭ شەتەلدىك ميسسيا وكىلدەرى وتىراتىن «جاسىل دالىزىنە»، ارتىنان پرەزيدەنت سارايىنا باسىپ كىردى، دەپ حابارلايدى قازاقپارات BBC اگەنتتىگىنە سىلتەمە جاساپ.
كۇشتىك قۇرىلىمدار اتىس قارۋى مەن كوزدەن جاس شىعاراتىن گاز قولداندى، قالاعا اسكەر كىرگىزىلىپ، كومەندانتتىق ساعات ەنگىزىلدى.
قاقتىعىستىڭ سالدارىنان كەمىندە 15 ادام ءولىپ، 200 دەن استامى جاراقات الدى.
تۇركيالىق انادولى اگەنتتىگىنىڭ حابارلاۋىنشا، سادردىڭ جاقتاۋشىلارى ۇكىمەتتىڭ وتستاۆكاعا كەتۋىن تالاپ ەتىپ جاتىر. وسىدان ەكى كۇن بۇرىن سادر ا ق ش ەلگە باسىپ كىرگەن 2013 -جىلدان كەيىن ساياساتقا ارالاسقانداردىڭ بارلىعىنىڭ (سادردىڭ ءوزىنىڭ بلوگىن قوسا العاندا) لاۋازىمدارىنان كەتۋىن تالاپ ەتتى.
يراكتىڭ INA اگەنتتىگىنىڭ حابارلاۋىنشا، تارتىپسىزدىكتەر باستالعاننان كەيىن مۋكتادا اس- سادر كۇش كورسەتۋ ارەكەتتەرى توقتاعانعا دەيىن اشتىق جاريالادى. الايدا يمامنىڭ كەڭسەسى مۇنى راستامادى.
يراكتىڭ پرەمەر- ءمينيسترى مۋستافا ال- كازىمي بىرىككەن جەدەل اسكەري قولباسشىلىق وكىلدەرىمەن كەزەكتەن تىس كەڭەس وتكىزىپ، ەرەۋىلشىلەردىڭ ءولىمى بويىنشا تەرگەۋ جۇرگىزۋدى تاپسىردى. ويتكەنى قارۋلانعان ساربازدارعا كوپشىلىككە وق اتۋعا تىيىم سالىنعان ەدى.
كۋۆەيتتىڭ يراكتاعى ەلشىلىگى ءوز ازاماتتارىن ەلدەن كەتۋگە، ال يراكقا ەندى بارعالى جاتقان ازاماتتارعا ءبىر- بىرىمەن باسەكەلەس شەيتتىك توپتاردىڭ تارتىپسىزدىكتەرىنە بايلانىستى ساپاردى كەيىنگە شەگەرە تۇرۋعا شاقىردى.
وسىعان دەيىن، ياعني دۇيسەنبى كۇنى باعدات كوشەلەرىندە سادريستەر «ۇيلەستىرۋ قۇرىلىمى» دەگەن اتاۋمەن بەلگىلى يراندىقتارعا جاقىن شەيىت توپتارىمەن اتىسقان بولاتىن.
يراكتى قولداۋ جونىندەگى ب ۇ ۇ ميسسياسى (UNAMI) بولعان جاعدايدى وتە قاۋىپتى شيەلەنىس دەپ اتاپ، بارلىق تاراپتاردى جاعدايدىڭ باقىلاۋدان شىعۋىنا اپاراتىن ارەكەتتەردەن اۋلاق بولۋعا شاقىردى.
«قازىر يراكتىڭ مەملەكەت رەتىندەگى ومىرىنە قاۋىپ ءتونىپ تۇر»، دەپ ەسكەرتتى ميسسيا وكىلدەرى.
ا ق ش وكىلدەرى سونىمەن قاتار باعداتتاعى تارتىپسىزدىكتەر تۋرالى حابارلارعا قاراماستان حالىقتى تىنىشتىققا شاقىردى.