التى ءتىل مەڭگەرگەن قازاق بالاسى ەرەكشە كاسىپ اشتى
باستى ماقساتى - جاساعان كىشكەنتاي دۇنيەلەرى ارقىلى ادامدارعا قۋانىش سىيلاپ، ءبىلىم ىزدەگەن جاندارعا شابىت بەرۋ. ول جاساعان دۇنيەلەر ۇلتتىق بوياۋىمەن، زاماناۋي ستيلىمەن ەرەكشەلەنەدى.
ءال-فارابي اتىنداعى قاز ۇ ۋ-دە ءبىلىم العان ساۋلەت باكالاۆردىڭ سوڭعى جىلىندا ارنايى باعدارلامامەن جاپونياعا بارادى. ونىڭ قيالىنا قانات بىتىرگەن دە وسى ساپار ەدى. توكيو شەت تىلدەرى ۋنيۆەرسيتەتىندە وقىپ ءجۇرىپ، «ءبىز نەگە ۇلتتىق ءستيلىمىزدى ساقتاي وتىرىپ، ءوز ەلىمىزدەن اكسەسۋارلار، كەڭسە تاۋارلارىن شىعارمايمىز؟» دەپ ويلايدى. ءيا، راسىمەن دە بىزدەگى مۇنداي دۇنيەلەر كوبىنە قىتايدان، رەسەيدەن اكەلىنەتىن. قويىن كىتاپشالاردىڭ سىرتىنان شەتەل جۇلدىزدارىنىڭ سۋرەتىن كورگەنگە كوز ۇيرەنگەن.
«19 ميلليون حالقى بار، تاۋەلسىز ەلدىڭ ازاماتى بولا تۇرىپ، نەگە وسىنداي دۇنيە جاسامايمىن؟ قولىمىزدان كەلەدى عوي. ونىڭ ۇستىنە تاريحىمىزدا كەيىنگى ۇرپاققا ۇلگى بولاتىن تۇلعا جەتەرلىك» دەگەن وي كەلدى. سوسىن «احمەت. ۇلت ۇستازى» فيلمىن كوردىم. الاش كوسەمىنىڭ «باسقادان كەم بولماۋ ءۇشىن ءبىز ءبىلىمدى، باي ءھام كۇشتى بولۋىمىز كەرەك. ءبىلىمدى بولۋ ءۇشىن وقۋ كەرەك. باي بولۋعا كاسىپ كەرەك. ال كۇشتى بولۋعا بىرلىك كەرەك» دەگەن ءسوزى بار ەمەس پە؟! بۇل فيلم شابىتىما شابىت قوستى»، - دەيدى ساۋلەت.
وسىلايشا، تاۋەكەلگە بارىپ، كاسىپ اشتى. بۇگىندە ونىڭ جاساعان زاتتارى ينتەللەكتۋالدى، ادەبي ورتادا ۇلكەن سۇرانىسقا يە. ءتىپتى، جاس كاسىپكەردىڭ يدەياسىن قولداپ، ينۆەستيتسيا قۇيىپ جاتقان ادامدار بار. ساۋلەتتىڭ ەندىگى ارمانى - ۇلتتىق نەگىزدە جاسالعان زاماناۋي دۇنيەلەر دۇكەنىن ەلىمىزدىڭ ءار قالاسىنان اشىپ، كاسىبىن كەڭەيتۋ. ارينە، ول ءۇشىن ءبىراز ەڭبەكتەنۋ كەرەك. سول ءۇشىن ءبىلىمىن جەتىلدىرىپ، شەتەلدىك كومپانيالارمەن جۇمىس ىستەپ جاتىر.
«جاقسى يدەيا الاتىن مەملەكەتتەر بار. شەتەلدە ءجۇرىپ، كوپ نارسە ۇيرەندىم. ماسەلەن، ادامعا، ءومىر ءسۇرىپ جاتقان ورتاعا دەگەن قۇرمەت. ماعان قاتتى اسەر ەتكەنى دە وسى. حالىقتىڭ ءبىر- بىرىنە سەنىمى، ادالدىعى باستى ورىندا. قانداي ءىس جاساسا دا، وزدەرىنىڭ ءتول مادەنيەتىنە يكەمدەيدى. الەمدەگى ەڭ كوپ ستارباكس جۇيەسى جاپونيادا بار. ولار ۇلتتىق ەرەكشەلىكتەرىن دارىپتەي وتىرىپ، زاماناۋي ۇلگىدەگى زاتتارىن كوپشىلىككە ۇسىنىپ وتىر. سوسىن ۋاقىتتى باعالايدى. كەشىكپەيدى. ءوزىنىڭ دە، وزگەنىڭ دە ۋاقىتىن باعالايدى»، - دەيدى كەيىپكەرىمىز.
ساۋلەت قازىر التى تىلدە ەركىن سويلەيدى: قازاق، قىتاي، جاپون، اعىلشىن، ورىس، تۇرىك ءتىلى. ءبىلىمدى جاسقا بىرنەشە ءتىلدى مەڭگەرۋ قيىن بولماعان. «قىتايدا تۋىپ- وسكەن سوڭ، جاپون ءتىلىن وڭاي ۇيرەندىم» دەيدى ول. بىرەۋلەرگە ءتىل ۇيرەنۋ حوببي بولسا، ساۋلەت ءۇشىن بۇل - قاجەتتىلىك.
«2014 -جىلى قازاقستانعا كەلدىم. كوپ ادام «وسىنشا ءتىلدى قالاي ۇيرەندىڭىز؟ دەپ سۇرايدى. ءوزىمنىڭ ءتىل ۇيرەنۋ ادىستەرىم بار. جالپى، مەديانىڭ ءتىلىن كوبىرەك مەڭگەرگەن ادام شەت ءتىلىن تەز ۇيرەنەدى. ءۇش مەملەكەتتە ءومىر سۇرگەننەن كەيىن ولاردىڭ ءتىلىن ءبىلۋ كەرەك بولدى. بىرنەشە كومپانيامەن جۇمىس ىستەيمىز. مىسالى، جاپونيادا جاپون ءتىلىن بىلمەسەڭىز، ولارمەن كوممۋنيكاتسياعا بارا المايسىز»، - دەيدى ساۋلەت.
جاس كاسىپكەر جاقىندا تاعى شەتەلگە بارايىن دەپ وتىر. سول جاقتا 2-3 جىل بويى جيناعان تاجىريبەسىن ەلىمىزگە الىپ كەلمەكشى.
ەل ەرتەڭى، مەملەكەتىمىزدىڭ جارقىن بولاشاعى بىلگىر جاستاردىڭ قولىندا ەمەس پە؟! سوندىقتان مۇراتىنا جەتۋگە تالپىنعان جاس كاسىپكەرگە وڭ ساپار تىلەدىك.