جانقوش تۇراروۆ كاسىپقوي بوكستاعى كەلەسى كەزدەسۋىنە قاتىستى مالىمدەمە جاسادى

نۇر-سۇلتان. قازاقپارات - ءبىرىنشى جارتىلاي ورتا سالماقتا ونەر كورسەتەتىن قازاقستاندىق بوكسشى جانقوش تۇراروۆ (25-0، 18 ك و) Vesti.kz تىلشىسىنە بەرگەن سۇقباتىندا كارەراسىنداعى قيىندىقتار تۋرالى ايتتى.

اڭگىمە بارىسىندا ول كەلەسى كەزدەسۋى قاشان وتەتىنى جايلى اقپاراتپەن ءبولىستى.

«مەن كارەرامدى اياقتامادىم. 25 جەڭىسىم بار رەكوردتى قالاي تاستاپ كەتە الامىن؟ ومىردە ءار-ءتۇرلى جاعدايلار بولىپ تۇرادى عوي. بۇرىنعى پروموۋتەرىممەن جۇمىستى توقتاتتىق. قازىرگى ۋاقىتتا جاڭا پروموۋتەرمەن كەلىسسوز جۇرگىزۋدەمىن. جۋىردا جاقسى جاڭالىق بولادى. ءاربىر بوكسشى الەم چەمپيونى بولعىسى كەلەدى. مەن دە سول ارمانىمنان باس تارتقانىم جوق. سوڭىنا دەيىن ماقساتىمدى ورىنداۋعا تىرىسامىن. شارشى الاڭعا مىقتى بولىپ قايتا ورالامىن»، - دەدى تۇراروۆ.

ايتا كەتەيىك، 31 جاستاعى بوكسشى ءوزىنىڭ سوڭعى كەزدەسۋىن 2021-جىلدىڭ جەلتوقسان ايىندا نۇر-سۇلتان قالاسىندا وتكىزىپ، مىسىرلىق بوكسشى ابدۋمونەم سايدتى (22-2-1، 11 ك و) 45 سەكۋدتا نوكاۋتقا تۇسىرگەن بولاتىن.