قاسىم-جومارت توقايەۆ ۇلتتىق قۇرىلتاي مۇشەلەرىمەن كەزدەستى
17:36, 26 - تامىز 2022
نۇر-سۇلتان. قازاقپارات - مەملەكەت باسشىسى قازاقستان رەسپۋبليكاسى پرەزيدەنتىنىڭ جانىنداعى ۇلتتىق قۇرىلتايدىڭ مۇشەلەرى سەرىك اقىلباي مەن سەرگەي حۋدياكوۆتى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
كەزدەسۋدە پرەزيدەنت «قازاقستان زاڭگەرلەر وداعى» رەسپۋبليكالىق قوعامدىق بىرلەستىگىنىڭ ءتوراعاسى سەرىك اقىلبايمەن وتاندىق قۇقىق جۇيەسىن دامىتۋدىڭ كەيبىر اسپەكتىلەرىن تالقىلادى. ۇلتتىق قۇرىلتاي مۇشەسى مەملەكەت باسشىسىنا ەلىمىزدەگى رەفورمالار اياسىندا ازاماتتاردىڭ قۇقىقتىق ساۋاتىن ارتتىرۋ تۋرالى ۇسىنىستارىن جەتكىزدى.
سونىمەن قاتار قاسىم-جومارت توقايەۆ ۇلتتىق قۇرىلتايدىڭ مۇشەسى، سولتۇستىك قازاقستان وبلىسى قوعامدىق كەڭەسىنىڭ وكىلى، «جەرگىلىكتى ءوزىن-ءوزى باسقارۋدى دامىتۋ ينستيتۋتى» جەكەشە مەكەمەسىنىڭ ديرەكتورى سەرگەي حۋدياكوۆتى قابىلدادى. جۇزدەسۋدە تۇرعىن ءۇي ساياساتى مەن جەرگىلىكتى ءوزىن-ءوزى باسقارۋ جۇيەسىن ودان ءارى جەتىلدىرۋگە قاتىستى ءبىرقاتار ۇسىنىس ايتىلدى. سونداي-اق سەرگەي حۋدياكوۆ قوعامدىق بىرلىكتى نىعايتۋ جونىندە كوزقاراسىن ءبىلدىردى.