تۇتىنۋشى قۇقىعىن قورعاۋ: ەندى ۇيالى تەلەفوندى تاپسىرىپ، اقشاسىن قايتارۋعا بولادى
وعان سايكەس، ەندى ساتىپ الۋشىلار كوڭىلىنەن شىقپاعان ۇيالى تەلەفونداردى تاپىسىرىپ، اقشاسىن قايتارىپ الا الادى. بۇرىن زاڭدا مۇنداي نورما بولماعان ەدى.
بۇل تۋرالى سولتۇستىك قازاقستان وبلىسى تۇتىنۋشىلاردىڭ قۇقىعىن قورعاۋ دەپارتامەنتىنىڭ باسشىسى ءلازىم مياشيەۆا ايتتى، دەپ حابارلايدى قازاقپارات ءتىلشىسى.
«قولدانىستاعى «تۇتىنۋشىلاردىڭ قۇقىقتارىن قورعاۋ تۋرالى» ق ر زاڭىندا تۇتىنۋشى ازىق- تۇلىكتەن باسقا تاۋاردى ساتىپ العان ساتتەن باستاپ 14 كۇن ىشىندە ونى ايىرباستاپ الۋعا قۇقىلى. ساتۋشىدا ايىرباستاۋعا قاجەتتى تاۋار بولماعان جاعدايدا ول تاۋاردى قايتارىپ الىپ، اقشاسىن بەرۋگە مىندەتتى. ەسكەرەتىنى - تاۋار قولدانىلماعان جانە بۇزىلماعان كۇيىندە ساقتالۋى ءتيىس. ايتا كەتۋ كەرەك، ازىق- تۇلىكتەن باسقا تاۋارلاردىڭ بارلىعىن بىردەي ايىرباستاۋعا، قايتارۋعا بولمايدى. ماسەلەن، دارىلىك زاتتار مەن مەديتسينالىق بۇيىمدار، ءىش كيىم، شۇلىق، جانۋارلار مەن وسىمدىكتەر، تالشىقتاردان جاسالعان ماتالار، تريكوتاج جانە گاردين توسەمى، كىلەم، شىلتەر، باۋ، سىم، ۇيالى تەلەفوندار قايتارۋعا جاتپايدى.
ال زاڭ ەنگىزىلەتىن تۇزەتۋلەر ناتيجەسىندە بۇل تىزىمنەن ۇيالى تەلەفونداردى الىپ تاستاۋ كوزدەلگەن. وسى تۇزەتۋلەر قابىلداعان كەزدە تۇتىنۋشى، ۇيالى تەلەفوندى ايىرباستاۋ جانە قايتارۋ مۇمكىندىگىنە يە بولادى»، - دەپ ەنەتىن وزگەرىستەرگە توقتالدى ءلازىم مياشيەۆا.
ونىڭ ايتۋىنشا، جاڭا وزگەرىستەرگە ساي ساتۋشى تاۋاردى قايتارعان ساتتەن باستاپ 3 جۇمىس كۇنى ىشىندە تۇتىنۋشىعا اقشانى قايتارىپ بەرۋگە مىندەتتەلەدى. سونداي- اق، ساتۋشىدا ايىرباستاۋعا قاجەتتى تاۋار بولماسا، وندا ول ون كۇن ىشىندە جاڭا تاۋاردى تاۋىپ بەرۋى ءتيىس.
قوسا كەتسەك، بۇل ۋاقىتقا دەيىن ەلىمىزدە تۇتىنۋشىلار قۇقىعىن قورعايتىن ومبۋدسمەن ينستيتۋتى ەنگىزىلەتىنىن حابارلاپ ەدىك.