قازاقستاندا تۇڭعىش رەسپۋبليكالىق ات مارافون-بايگەسى وتەدى
بۇل جاڭالىقپەن ق ر مادەنيەت جانە سپورت ءمينيسترى داۋرەن ابايەۆ Facebook-پاراقشاسىندا ايتتى، دەپ حابارلايدى قازاقپارات ءتىلشىسى.
«بۇگىن وزدەرىڭىزگە وسى ۆيدەوۇندەۋ ارقىلى جاعىمدى جاڭالىعىمىزدى، ءسۇيىنشى حابارىمىزدى جەتكىزۋدىڭ ءساتى كەلىپ تۇر. وزدەرىڭىزگە بەلگىلى، حالقىمىز ءۇشىن جىلقى جانۋارىنىڭ ورنى بولەك. «ءتۇبىمىز - تۇركى، تۇلىگىمىز - جىلقى» دەيتىن قازاق اتامىز تۇلپاردى ەرەكشە قادىرلەگەن. قازاق دالاسىندا ەجەلگى بوتاي قونىسىندا جىلقىنىڭ قولعا ۇيرەتىلگەنى ارحەولوگيالىق قازبالار ارقىلى دالەلدەندى. بۇگىنگى دۇنيەجۇزى الاش بالاسىن ارعىماقتى العاش ەرتتەگەن ەل دەپ تانيدى. وسى رەتتە سول كوشپەندى بابالارىمىزدىڭ زاڭدى مۇراگەرى رەتىندە ات سپورتى مەن ات ءتۋريزمىن زامانعا ساي جاڭعىرتۋ ماقساتىندا جاڭا جوبانى قولعا الدىق»، - دەدى داۋرەن ابايەۆ.
ءمينيستردىڭ اتاپ وتۋىنشە، بۇگىندە الەم ەلدەرى ات جارىسىنىڭ ءتۇر-ءتۇرىن وتكىزەدى. ا ق ش-تا، ەۋروپادا، باسقا دا مەملەكەتتەردە قىسقا جانە ۇزاق قاشىقتىققا ارنالعان بايگەلەر كوپ.
«ءبىراق، سول جارىستاردىڭ ىشىندەگى ەڭ ۇزاق قاشىقتىق 160 شاقىرىمنان اسپايدى ەكەن. ءبىز سونىڭ ءبارىن سارالاي كەلە قاشىقتىق 1200 شاقىرىمنان اساتىن «ۇلى دالا جورىعى» اتتى 12 كۇندىك الامان جارىس، مارافون- بايگە ۇيىمداستىرۋدى قولعا الىپ وتىرمىز. بۇل قازاقستاندا بۇرىن- سوڭدى بولماعان، الەمدە تەڭدەسى جوق مارافون- بايگە بولادى دەپ ويلايمىن. سونداي- اق بۇل الامان جاي عانا ات جارىسى ەمەس. قازاق حالقىنىڭ سالت- ءداستۇرىن جاڭعىرتاتىن، رۋحىن وياتاتىن، قازاقستاننىڭ باي تابيعاتى مەن تاريحىن زەردەلەيتىن، جاڭا تۋريستىك مارشۋرتتاردى قالىپتاستىراتىن تىڭ جوبا بولماق»، - دەدى ول.
داۋرەن ابايەۆ مارافون- بايگە باعىتىن تاڭداۋدا دا ۇزاق ويلانعاندارىن ايتادى.
«بۇل ەگەمەن ەلىمىزدىڭ تاريحىندا ەڭ ۇزاق قاشىقتىقتاعى الامان بولعاندىقتان ول ەڭسەلى ەلوردامىزدان باستاۋ الىپ، كيەلى تۇركىستان شاھارىنا قاراي اتتانعانىن ءجون كوردىك. مارافونشىلار مارەگە 12 كۇن ىشىندە اتپەن جەتۋى ءتيىس. وسىنداي ۇزاق جولعا مويىماعان شىن مىقتىلار قوماقتى جۇلدەمەن ماراپاتتالادى. مارافون- بايگەگە ءار وڭىردەن ءبىر- ءبىر كوماندا شاقىرامىز. 5 شاباندوزدان قۇرالعان كوماندالاردىڭ ءارقايسىسى ءوز ايماعىنىڭ نامىسىن قورعاۋى ءتيىس. جارىسقا قاتىسۋ ءۇشىن qazanat.com سايتىندا ءوتىنىم قالدىرۋدى سۇرايمىز. الاماننىڭ تولىق شارتتارى مەن ەرەجەسى وسى سايتتا كورسەتىلگەن. ىرىكتەۋدەن وتكەن 20 كوماندا 18-قىركۇيەكتە نۇر- سۇلتان قالاسىنان «ۇلى دالا جورىعىنا» اتتانادى.
بۇل بايگە بولاشاقتا ءوزىمىزدىڭ ات ۇستىندەگى ءداستۇرلى «پاريج داكار» نەمەسە «تۋر دە فرانس» سياقتى ۇلكەن- ۇلكەن جوبا بولادى دەپ ۇمىتتەنەمىن. جىگىتتەرىمىز جىگەرىن سىنايتىن، قازاناتتارىمىز قاجىر- كۇشىن كورسەتەتىن مارافون- بايگەگە بارلىعىڭىزدى جانكۇيەر بولۋعا شاقىرامىن»، - دەدى مينيستر.