ساياسات نۇربەك حالىق تابىسىن ارتتىرۋعا ارنالعان ءبىلىم جوباسى تۋرالى ايتتى
بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى، دەپ حابارلايدى قازاقپارات ءتىلشىسى.
«قازىر حالىق تابىسىن ارتتىرۋدىڭ 2022-2024-جىلدارعا ارنالعان «ماماندىعىم-بولاشاعىم» باعدارلاماسى بويىنشا قارجىلاندىرۋ جۇمىسى ءجۇرىپ جاتىر. اتالعان جوباعا قاتىساتىن 20 جوعارى وقۋ ورىندارىنىڭ ءتىزىمى جۋىقتا حابارلانادى. جوبا ماقساتىنا سايكەس وڭىرلىك جانە سالالىق جوعارى وقۋ ورىندارى سۇرانىسقا يە مامانداردى دايارلاۋدى ءوز موينىنا الىپ، جەرگىلىكتى وزىق تاجىريبە تاراتۋ ورتالىقتارىنا اينالۋى ءتيىس»، - دەدى ساياسات نۇربەك ەلوردادا ءوتىپ جاتقان «ادامي كاپيتال - جاڭا قازاقستان دامۋىنىڭ نەگىزگى رەسۋرسى» اتتى عىلىم جانە جوعارى ءبىلىم فورۋمىندا.
ءمينيستردىڭ ايتۋىنشا، حالىق تابىسىن ارتتىرۋعا ارنالعان «ماماندىعىم-بولاشاعىم» جوباسى اياسىندا مىناداي جۇمىس قولعا الىنادى:
1) الداعى 5 جىلعا ءوڭىر نەمەسە سالا يننوۆاتسيالارى مەن كادر قاجەتتىلىگىنە فورسايت-زەرتتەۋلەر جانە بولجام جۇرگىزىلەدى؛
2) ءار ءوڭىر ماماندىقتار بويىنشا كاسىپتەر اتلاسىن ازىرلەپ، ماماندار دايارلايدى:
3) كاسىپتەر اتلاسىنا سايكەس جاڭا ءبىلىم بەرۋ باعدارلامالارىن ازىرلەۋ جانە وزەكتى ەتۋ؛
4) جاڭارعان ءبىلىم بەرۋ باعدارلامالارى ءۇشىن پروفەسسورلىق-وقىتۋشىلىق قۇرام دايارلاۋ.
«تۇتاستاي العاندا، جوعارى وقۋ ورىندارى سول وڭىردەگى يننوۆاتسيالىق، عىلىمي-تەحنولوگيالىق، كادرلىق جانە وندىرىستىك بەلسەندىلىكتى جيناقتايتىن ورىنعا اينالدىرۋ كەرەك. ءوزارا ءىس-قيمىل ءۇشىن ستراتەگيالىق تۇعىرناما بولۋى ءتيىس. وسى تۇرعىدا، بىزدە ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن ولاردىڭ ايماقتىق حابتارىن وڭىرلىك ۋنيۆەرسيتەتتەردى دامىتۋ باعدارلاماسىمەن ۇشتاستىرۋ جونىندە الدىن الا ۋاعدالاستىق بار ەكەنىن اتاپ وتكىم كەلەدى»، - دەيدى س. نۇربەك.