ەكس-پرەزيدەنتتەرگە بەرىلگەن ارتىقشىلىقتار جويىلادى
قوعام تالقىسىنا شىققان زاڭ جوباسىندا ەكس-پرەزيدەنتتەرگە بەرىلگەن ءبىرقاتار جەڭىلدىكتەردى الىپ تاستاۋ قارالعان. وندا ەكس-پرەزيدەنتتەردى مەملەكەت ەسەبىنەن اسىراۋدى توقتاتۋ، وققاعار الىپ ءجۇرۋ جانە كوممۋنالدىق تولەماقىلاردى ءوز ەسەبىنەن جۇرگىزۋ ۇسىنىلعان.
بۇدان بولەك جاڭا پرەزيدەنت سايلانعاننان كەيىن ءبىر ايدىڭ ىشىندە ەكس-پرەزيدەنت مەملەكەتتىك رەزيدەنتسيادان شىعىپ كەتۋى كەرەك.
ەگەر زاڭ جوباسى قولداۋ تاپسا، پرەزيدەنت قىزمەتىن توقتاتقان كۇننەن باستاپ ءوزى جانە وتباسى مۇشەلەرىنىڭ ەمحانالاردا تەگىن ەمدەۋ قۇقىعى جويىلىپ، مەملەكەتتىك ساياجايلارى قايتارىلاتىن بولادى.
زاڭ جوباسىن ازىرلەگەن دەپۋتات جەڭيشبەك توكتوربايەۆ تۇركيا، وڭتۇستىك كورەيا سەكىلدى قۋاتتى ەلدەردىڭ وزىندە ەكس-پرەزيدەنتتەرگە مۇنداي ارتىقشىلىق بەرىلمەگەنىن ايتادى.
قازىر قىرعىزستاندا روزا وتۋنبايەۆا مەن سوورونباي جەەنبەكوۆ قانا ەكس-پرەزيدەنت مارتەبەسىنە يە.
«ازاتتىق»