دوكتورانتۋراعا تۇسكەن تالاپكەرلەردىڭ ءتىزىمى جاريالاندى

نۇر- سۇلتان. قازاقپارات - ۇلتتىق تەستىلەۋ ورتالىعى دوكتورانتۋراعا سىناق تاپسىرعانداردىڭ جيناعان ۇپايىنىڭ قورىتىندىسىن جاريالادى، دەپ حابارلايدى قازاقپارات.

دوكتورانتۋرا ەمتيحانىنىڭ ناتيجەسىن مىنا سىلتەمەدەن جۇكتەپ الۋعا بولادى.

«قوسىمشا اقپارات بويىنشا قۇجات تاپسىرعان ج و و-عا جۇگىنە الاسىزدار» دەپ ەسكەرتتى تەستىلەۋ ورتالىعى.

ەسكە سالا كەتەيىك، بۇعان دەيىن ەلىمىزدە دوكتورانتۋراعا ءتۇسۋ ەمتيحاندارى باستالعانىن حابارلاعان بولاتىنبىز.

بيىل دوكتورانتۋراعا تۇسۋگە ۇمىتكەرلەر اڭگىمەلەسۋدەن ءوتىپ، ەسسە جازدى، سونداي-اق وقۋعا دايىندىعىن انىقتاۋعا ارنالعان تەست جانە ءبىلىم باعدارلاماسى توبىنىڭ بەيىنى بويىنشا ەمتيحان تاپسىرادى.

سونىمەن قاتار دوكتورانتۋراعا ءتۇسۋ ءۇشىن شەت ءتىلىن جانە قازتەست جۇيەسى بويىنشا (قازتەست ەمتيحانىن 25-تامىزعا دەيىن تاپسىرۋعا بولادى) مەملەكەتتىك ءتىلدى مەڭگەرگەنىن راستايتىن سەرتيفيكات بولۋى مىندەتتى.

بيىل دوكتورانتۋراعا تۇسۋگە 2 مىڭعا جۋىق ۇمىتكەر ءوتىنىش بەرگەن. قۇجات 5-شىلدە مەن 5-تامىز ارالىعىندا قابىلداندى.

وقۋعا ءتۇسۋ ءۇشىن ءبىر عانا جوعارى وقۋ ورنىن جانە ءبىر ءبىلىم باعدارلاماسىن تاڭداۋعا بولادى.

دوكتورانتۋراعا گرانتقا جانە اقىلى نەگىزدە وقۋعا ءتۇسۋ شەگى - 75 بالل.

اۆتور جانات قاپالبايەۆا