قازاق مادەنيەتى جايلى جازاتىن جازۋشى قىتايدىڭ مەملەكەتتىك سىيلىعىنا ۇسىنىلدى
سەيسەنبى كۇنى قىتايدىڭ لۋ سين اتىنداعى مەملەكەتتىك سىيلىعىن تاعايىنداۋ جونىندەگى كوميسسياسىنىڭ شەشىمىمەن، كونكۋرستىڭ العاشقى ىرىكتەۋىنەن وتكەن 70 شىعارمانىڭ ءتىزىمى جاريالاندى. بۇل تىزىمگە قىتايدىڭ التاي ايماعىندا تۇراتىن، اسەم سياوتسي دەگەن لاقاپ اتپەن تانىمال قىتاي جازۋشىسى چجوۋ چجيحۋەيدىڭ «مۇڭسىز جايلاۋ جازبالارى» اتتى ەسسەلەر جيناعى دا ەنىپ وتىر.
بۇعان دەيىن «مۇڭسىز جايلاۋ»، «التايمەن جۇزدەسۋ»، «سەرىگىم ميتان»، «سوتقار بالاقاي بەك» سەكىلدى ونعا جۋىق كىتابى جارىق كورگەن چجوۋ چجيحۋەيدىڭ ەسىمى سوڭعى كەزدە قىتايدىڭ ادەبيەت سالاسىندا ءجيى ايتىلىپ ءجۇر. بۇعان دەيىن دە بىرنەشە مارتە مەملەكەتتىك دەڭگەيدەگى سىيلىقتى قانجىعاسىنا بايلاعان جاس جازۋشىنىڭ شىعارمالارى وقىرمان تاراپىنان جىلى قابىلدانىپ كەلەدى. وسى جولى مەملەكەتتىك سىيلىققا ۇسىنىلعان ەسسەلەر جيناعىندا، اۆتور «مۇڭسىز جايلاۋ - كوشپەندىلەردىڭ ماتەريالدىق ەمەس مادەني مۇرالارىنىڭ ەتنوگرافيالىق تۇراعى» جايلى سىر شەرتەدى.
چجوۋ چجيحۋەي - ۇرىمجىدەگى شىنجاڭ ونەر ينستيتۋتىنىڭ تۇلەگى. ءبىراز جىلدان بەرى التاي ايماعىنىڭ مادەنيەت سالاسىندا ەڭبەك ەتىپ، كوشپەندىلەردىڭ ماتەريالدىق ەمەس مادەني مۇرالارىن قورعاۋ، مۇراعاتتاۋ، زەرتتەۋ جۇمىستارىمەن اينالىسىپ كەلەدى. جۇمىس بارىسىندا، مادەني قۇندىلىقتاردىڭ ماڭىزىن تانىتىپ، ءمانىن اشاتىن كورنەكى نىسانداردى قورعاۋ مەن ساقتاۋعا جەتكىلىكتى ءمان بەرىلمەيتىنىن ەسكەرىپ، وسىدان ون جىل بۇرىن ءوز قاراجاتىنا ق ح ر التاي قالاسىنىڭ شىعىس قوبى قىستاعىندا قازاقتىڭ ەتنوگرافيالىق كەلبەتىن تانىتاتىن مۇرالار كوللەكتسياسى جيناقتالعان شىعارماشىلىق بازا اشۋدى قولعا الادى. ونىڭ شىعارمالارىنىڭ دەنى وسى اۋىلدا جازىلعان جانە كوبىنەسە قازاقتىڭ باي مادەني ءداستۇرى جايلى وي تولعاۋىمەن قۇندى. بۇل كۇندە اتالعان ءۇي-مۇراجايعا جەرگىلىكتى بيلىك جەكە ەتنوگرافيالىق مۇراجاي مارتەبەسىن بەرىپ، ول قالاداعى ەڭ تانىمال تۋريستىك نىسانداردىڭ بىرىنە اينالىپ ۇلگەرگەن.
اتاپ وتەر جايت، لۋ سين اتىنداعى مەملەكەتتىك سىيلىق - قىتايدىڭ ادەبيەت سالاسىنداعى ەڭ مارتەبەلى سىيلىقتارىنىڭ ءبىرى. 1995-جىلدان بەرى تۇراقتى تۇردە بەرىلىپ كەلەدى. بۇعان دەيىن التاي جانە التاي قازاقتارى تۋرالى بىرنەشە ەڭبەك جازعان قىتاي جازۋشىسى لي تسزيۋان دا 2017-جىلى اتالعان سىيلىققا يە بولعان ەدى.
اۆتور
ەرلان مازان