«ەلىمىزدە جاس قالامگەرلەر لەگىن قالىپتاستىرىپ، ولارعا ءتيىستى قولداۋ ءبىلدىرۋ، الەمدىك دەڭگەيدەگى تاقىرىپتارعا قالام تەربەۋىنە مۇمكىندىك تۋعىزۋ ماقساتىندا 2023-جىلدان باستاپ قازاقستاندىق جاس جازۋشىلار مەن اقىندار ءۇشىن پرەزيدەنتتىڭ ارنايى ادەبي سىيلىعى تاعايىندالادى. سىيلىق 18-29 جاس ارالىعىنداعى جاس قالامگەرلەرگە «پروزا»، «پوەزيا»، «دراماتۋرگيا»، «بالالار ادەبيەتى» نوميناتسيالارى بويىنشا بۇرىن جاريالانباعان شىعارمالارى ءۇشىن تابىستالادى»، - دەدى ق ر مادەنيەت جانە سپورت مينيسترلىگى ارحيۆ جانە قۇجاتتامانى باسقارۋ كوميتەتىنىڭ ءتوراعاسى قۋات بوراش ورتالىق كوممۋنيكاتسيالار قىزمەتىندە.
سپيكەردىڭ ايتۋىنشا، ءار نوميناتسيا جەڭىمپازىنا 4 ميلليون تەڭگە جۇلدە بەرىلەدى.
«پرەزيدەنتتىڭ ارنايى ادەبي سىيلىعى ەكى جىلدا ءبىر رەت وتكىزىلەدى. ونىڭ «اباي» اتىنداعى مەملەكەتتىك سىيلىقپەن قاتار وتپەۋى ءۇشىن كەزەكتەسىپ ۇيىمداستىرىلادى»، - دەدى ق. بوراش.
ودان بولەك، قۋات بوراش ادەبيەتتى قولداۋ سالاسىنداعى جوبالار تۋرالى باياندادى.
«بيىل جاڭا «جاڭا قازاق ادەبيەتى» جوباسى ىسكە قوسىلدى، ونىڭ اياسىندا جاس اۆتورلاردىڭ كىتاپتارى 3 مىڭ دانا تارالىممەن باسىپ شىعارىلادى. سونىمەن قاتار، اۆتورلار مەن باسپالاردى قولداۋ ماقساتىندا كىتاپ جارمەڭكەلەرى وتكىزىلەدى. مىسالى، 28-30- مامىر ارالىعىندا «الماتى كىتاپ جارمەڭكەسى» وتكىزىلدى. جارمەڭكەگە اكەلىنگەن 14 مىڭنان استام كىتاپتىڭ 70 پايىزى ساتىلعان. سونداي-اق، مينيسترلىك وسى جىلدىڭ 23-25- قاراشاسىندا «ۇلى جىبەك جولىمەن» X حالىقارالىق كىتاپ جانە پوليگرافيا جارمەڭكەسىن وتكىزۋدى جوسپارلاپ وتىر»، - دەدى ق. بوراش.
ەسكە سالا كەتەيىك، «ايبوز» ۇلتتىق ادەبي سىيلىعى بايقاۋىنا شىعارمالار ءالى دە قابىلدانىپ جاتىر. ءوتىنىمدى aiboz@kitap-palatasy.kz ەلەكتروندى مەكەنجايىنا 2022-جىلعى 15- ماۋسىمنان 1- قازانعا دەيىن جىبەرۋگە بولادى. جەڭىمپازعا 5 ميلليون تەڭگە جۇلدە بەرىلەدى.
بايقاۋدىڭ تولىق ەرەجەسى مەن تۇجىرىمداماسى http://kitap-palatasy.kz سايتىندا جازىلعان.