تاۋتەكە، ارىستان، قوي مۇسىندەرى، بالبالدار - موڭعوليادان تابىلعان جادىگەرلەر
«كەشەننىڭ جالپى اۋماعى – 49x 41,5 م. باتىستان شىعىسقا قاراي سوپاقشا بولىپ سوزىلا ورنالاسقان كەشەندى اينالدىرا قورشاپ ور قازىپ، ودان شىققان توپىراقتى ءۇيىپ قامال جاساعان. نىساننىڭ باتىس جاعىندا ورتاسىندا ويىعى بار تەكشە تاس (التار)، ادامنىڭ تاس مۇسىندەرى، قاسىندا ەكى كۇشىگى بار ارىستان جانە ەكى قوي ءمۇسىنى ورنالاسقان. كەشەننىڭ قاقپاسىنان شىعىسقا قاراي 51 بالبال تاس ءتىزىلىپ تۇر. ولاردىڭ ىشىندە بەس بالبالدان اشينا اۋلەتىنە تيەسىلى «تاۋتەكە» تاڭباسى انىقتالدى»، - دەپ جازدى اكادەميانىڭ رەسمي سايتى.
سونداي-اق، كەشەندە بارىقتىڭ (تابىنۋ ورنى) بولعانىن ايقىندايتىن قىش جابىندار مەن جاياۋ جۇرگىنشى جولىنا توسەلگەن كىرپىش قالدىقتارى قازىپ الىنىپتى.
«بارىقتىڭ الدىنان ەڭسەلى جازبا ەسكەرتكىشتىڭ جوعارعى بولىگى مەن تاسباقا تۇعىرى تابىلدى. تابىلعان قۇندى ولجانىڭ ەكى بەتىندە 12 جولدان تۇراتىن كونە تۇرىك بىتىك جازۋى، ال ءۇشىنشى قىرىندا كونە سوعدى جازۋى قاشالعان. ەكسپەديتسياعا قاتىسۋشى عالىمدار ەسكەرتكىش ماتىنىنەن «ءتاڭىر»، «تۇرك»، «قۇتلىق»، «تۇمەن» سەكىلدى ءبىرقاتار سوزدەردى انىقتادى. جازبا ماتىنىنەن الىنعان مالىمەتتەرگە سۇيەنە وتىرىپ، نومعون كەشەنىن كۇلتەگىن مەن بىلگە قاعاننىڭ اكەسى، تۇرىك قاعاندىعىن قايتا جاڭعىرتۋشى قۇتلىق ەلتەرىس قاعانعا ارنالعان دەگەن تۇجىرىم جاسالىپ وتىر. بۇعان قوسا، بىتىكتاس «تۇرك» اتاۋى العاش رەت كەزدەسەتىن ەڭ كونە تۇركى ءداۋىرىنىڭ جازبا ەسكەرتكىشى سانالادى»، - دەپ جازادى اكادەميا عالىمدارى.
ارحەولوگتاردىڭ پايىمىنشا، نومعون عۇرىپتىق كەشەنى بارلىق بەلگىلەرى جاعىنان بىلگە قاعان مەن كۇلتەگىن عۇرىپتىق كەشەندەرىنە ۇقساس.
نومعون جازبا ەسكەرتكىشىنىڭ جوعارعى تۇسىندا تومەن قاراعان، دەنەسى ايداھار بەينەسىندەگى ەكى ءبورىنىڭ باسى بەينەلەنگەن. بۇعان دەيىن وسىعان ۇقساس قاعاندىق اتريبۋتيكالار تاسپار قاعان، بىلگە، كۇلتەگىن جانە ەسكەرتكىشتەرىندە قاشالعان كورىنەدى.
اكادەميا نومعون ەكسپەديتسياسىنىڭ ناتيجەلەرىنە ارنالعان عىلىمي جيناق ازىرلەمەك. كەيىن ول جيناق تۇركى مەملەكەتتەرىنىڭ استانالارىندا تانىستىرىلادى.
ەسكە سالساق، كەشە تۇرىك قاعاندىعىن قايتا داۋىرلەتكەن ۇلى قۇتلىق ەلتەرىس قاعاننىڭ كەشەنى تابىلعانى حابارلانعان بولاتىن.