ەندى ج و و- لار جاڭا وقۋ باعدارلاماسىن بولجامسىز جاساي المايدى - ساياسات نۇربەك

نۇر- سۇلتان. قازاقپارات - ەندى جوعارى وقۋ ورىندارى مەن كاسىپتىك ءبىلىم بەرەتىن ۇيىمدارعا جاڭا وقۋ باعدارلاماسىن بولجامسىز جاساۋعا تىيىم سالىنادى. ولار ەڭبەك نارىعىنداعى مامان تاپشىلىعى ماسەلەسىن ەسكەرۋى ءتيىس.

ءبىلىم سالاسىنىڭ ساراپشىلارى باس قوسقان فورۋمدا عىلىم جانە جوعارى ءبىلىم ءمينيسترى ساياسات نۇربەك وسىلاي دەپ ءمالىم ەتتى، دەپ حابارلايدى قازاقپارات ءتىلشىسى.

«مەن سوڭعى 3-4 جىلدا «جاڭا ماماندىقتار اتلاسى» دەگەن جوبامەن اينالىستىم. ول قازىر حالىقتىڭ كىرىسىن كوتەرۋ باعدارلاماسىنا ەنگىزىلدى. وسىعان ساي، ءار ءوڭىر ءوزىنىڭ ايماعىنا الداعى 5-10 جىلدا قاجەت بولاتىن ماماندىقتاردىڭ اتلاسىن جاسايدى. جوسپار دايىن بولعاننان كەيىن، تاپشى ماماندىقتارعا كوبىرەك وقىتۋ باستالادى. ياعني، ەلىمىزدەگى جوعارى وقۋ ورىندارى مەن كاسىپتىك ءبىلىم بەرۋ ۇيىمدارى باسىمدىقتى ماماندىقتار اتلاسىندا كورسەتىلگەن سالالارعا بەرەدى. ەندى جوعارى وقۋ ورىندارى جاڭا وقۋ باعدارلاماسىن بولجامسىز جاساي المايدى. وعان تىيىم سالىنادى. قازىر ونىڭ مەحانيزىمىن قاراستىرىپ جاتىرمىز. ونىڭ ناتيجەسىندە جوعارى جانە كاسىپتىك ءبىلىم بەرەتىن ۇيىمدار ەڭبەك نارىعىنداعى تاپشىلىقتى ەسكەرەدى»، - دەپ اتاپ ءوتتى ساياسات نۇربەك.

ايتا كەتەيىك، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك ستۋدەنتتەردىڭ ءبىلىمىن باعالاۋ ءتاسىلى وزگەرەتىنىن مالىمدەگەن ەدى.

اۆتور

ءاليحان اسقار