قازاقستان اسكەريلەرى حالىقارالىق ارميا ويىندارىنىڭ بارلىق كەزەڭىندە جەڭىسكە جەتتى - فوتو
قارۋلى كۇشتەردىڭ ۇلتتىق اسكەري- پاتريوتتىق ورتالىعىندا حالىقارالىق ارميا ويىندارىنىڭ سالتاناتتى جابىلۋ ءراسىمى ءوتتى.
«ارتيللەريالىق اتىس شەبەرلەرى»، «تاكتيكالىق مەرگەن»، «مەريديان» كونكۋرستارى جامبىل، قاراعاندى جانە اقمولا وبلىستارىنداعى ءۇش وقۋ- جاتتىعى پوليگونىندا ءوتتى. وعان قازاقستان، ازەربايجان، ارمەنيا، بەلارۋس، ۆەنەسۋەلا، ۆەتنام، زيمبابۆە، يران، قىتاي، قىرعىزستان، مالي، رەسەي، تاجىكستان جانە وزبەكستان كوماندالارى قاتىستى.
ءۇش كونكۋرستىڭ بارىندە قازاقستاننىڭ اسكەري قىزمەتشىلەرى جەڭىسكە جەتتى.
قورعانىس ءمينيسترىنىڭ ءبىرىنشى ورىنباسارى – ق ر قارۋلى كۇشتەرى باس شتابىنىڭ باستىعى مارات قۇسايىنوۆ اسكەريلەر باسەكەسىنىڭ قورىتىندىسىن جاريا ەتتى.
ماسەلەن، جامبىل وبلىسىنداعى «گۆاردەيسك» پوليگونىندا وتكەن «ارتيللەريالىق اتىس شەبەرلەرى» كونكۋرسىندا قازاقستاندىق مينومەت ەسەپتوپتارى ءبىرىنشى ورىنعا يە بولدى. بارلىق كەزەڭدەردىڭ قورىتىندىسى بويىنشا ەكىنشى ورىندى رەسەيدىڭ اسكەري قىزمەتشىلەرى يەلەنسە، ءۇشىنشى ورىنعا ازەربايجاننىڭ ارتيللەريستەرى كوتەرىلدى.
قاراعاندى وبلىسىنداعى «سپاسسك» پوليگونىندا وتكەن «تاكتيكالىق مەرگەن» بايقاۋىندا ءبىرىنشى كەزەڭنەن- اق قازاقستان كومانداسى كوش باستادى. ءبىزدىڭ جاۋىنگەرلەر بارلىق كەزەڭدەردە سەنىمدى جەڭىسكە جەتىپ، بايقاۋ قورىتىندىسى بويىنشا ءبىرىنشى ورىنعا يە بولدى. جەڭىس تۇعىرىنىڭ ەكىنشى ساتىسىنا قىتاي كومانداسى كوتەرىلسە، ءۇشىنشى ورىندى وزبەكستان مەن رەسەي قۇرامالارى ءبولىستى.
اقمولا وبلىسىنداعى «اماندىق» پوليگونىندا اسكەري توپوگرافتار كاسىبي شەبەرلىكتەرىن سىنعا سالدى. «مەريديان» بايقاۋىندا دا ءبىرىنشى ورىنعا قازاقستان كومانداسى يە بولدى. ەكىنشى ورىندى - قىتاي اسكەري قىزمەتشىلەرى، ءۇشىنشى ورىندى وزبەكستان مەن بەلارۋس كوماندالارى ءوزارا ءبولىستى.
جارىس جەڭىمپازدارى مەن جۇلدەگەرلەرى مەدالدارمەن جانە ديپلومدارمەن ماراپاتتالدى. سونىمەن قاتار ءار كونكۋرستا جەكە نوميناتسيالار بويىنشا جەڭىمپاز اتانعاندار دا جۇلدەلەرمەن ماراپاتتالدى.
فوتو: ق ر قورعانىس مينيسترلىگىنىڭ باسپا ءسوز قىزمەتى