ءىستى بولعان ق ر س ءى م-نىڭ بۇرىنعى شەنەۋنىكتەرى اقتالىپ شىقتى
نۇر-سۇلتان قالاسى سوتىنىڭ قىلمىستىق ىستەر جونىندەگى سوت القاسى ق ر سىرتقى ىستەر مينيسترلىگىنىڭ بۇرىنعى جاۋاپتى حاتشىسى اناربەك قاراشيەۆ، قازاقستاننىڭ وزبەكستانداعى بۇرىنعى ەلشىسى ەرىك وتەمبايەۆ جانە «ديپلوماتيالىق قالاشىق قۇرىلىسى ديرەكتسياسى» ج ش س ديرەكتورى ب. نۇرەكەنوۆكە قاتىستى قىلمىستىق ءىستى قارادى.
«ەسكە سالا كەتەيىك، بۇدان بۇرىن نۇر-سۇلتان قالاسى «بايقوڭىر» اۋدانىنىڭ № 2-سوتىنىڭ 2020-جىلعى 18- قىركۇيەكتەگى ۇكىمىمەن ا. قاراشيەۆ (ق ر س ءى م- ءنىڭ بۇرىنعى جاۋاپتى حاتشىسى) لاۋازىمدىق وكىلەتتىگىن اسىرا پايدالانعانى، ال ە. وتەمبايەۆ (قر وزبەكستانداعى بۇرىنعى ەلشىسى) جانە ب. نۇرەكەنوۆ (مەردىگەرلىك ۇيىمنىڭ ديرەكتورى) - اتالعان ءىس-ارەكەتتەرگە جاردەمدەسكەنى ءۇشىن كىنالى دەپ تانىلعان بولاتىن»، - دەلىنگەن حابارلامادا.
اپەللياتسيالىق القا اتالعان ىسكە قاتىستى «قىزمەتتىك وكىلەتتىكتى تەرىس پايدالانۋ» ايىبى بويىنشا زالال جوق دەگەن قورىتىندىعا كەلدى.
«ا. قاراشيەۆتىڭ لاۋازىمدىق وكىلەتتىكتەرىن تەرىس پايدالانۋى جانە وعان ە. وتەمبايەۆ پەن ب. نۇرەكەنوۆتىڭ جاردەمدەسۋ ءىس-ارەكەتى مەن سەبەپ-سالدارى دالەلدەنبەگەن. ال دالەل قىلمىس قۇرامىنىڭ مىندەتتى بولىگى»، - دەپ حابارلايدى قالالىق سوتتان.
لاۋازىمدىق وكىلەتتىگىن تەرىس پايدالانۋ بويىنشا تۇلعانى كىنالى دەپ تانۋ ءۇشىن كەلەسى جاعدايلاردى انىقتاۋ قاجەت:
- جەكە باسىنا، باسقا ادامدارعا نەمەسە ۇيىمدارعا قاتىستى قىزمەتتىك وكىلەتتىگىن پايدالانۋ ماقساتىنىڭ بولۋى؛
- قىزمەتتىك وكىلەتتىگىن پايدالانۋ كەزىندە باسقا ادامدارعا نەمەسە ۇيىمدارعا زيان كەلتىرۋ.
«سوت تەرگەۋى بارىسىندا اپەللياتسيالىق ساتىدا ا. قاراشيەۆتىڭ قىزمەت بابىن تەرىس پايدالانعانى جانە ە. وتەمبايەۆ پەن ب. نۇرەكەنوۆ تاراپىنان جاردەم بەرىلگەنى راستالمادى. ءىستى قاراۋ ناتيجەسى بويىنشا قىلمىستىق ىستەر جونىندەگى سوت القاسىمەن اقتاۋ ۇكىمى شىعارىلدى»، - دەپ جازىلعان سوتتىڭ اقپاراتىندا.
ەسكە سالا كەتسەك، 2020-جىلى 2- قازاندا ق ر سىرتقى ىستەر مينيسترلىگىنىڭ بۇرىنعى جاۋاپتى حاتشىسى اناربەك قاراشيەۆ پەن قازاقستاننىڭ وزبەكستانداعى بۇرىنعى ەلشىسى ەرىك وتەمبايەۆقا قاتىستى نۇر-سۇلتان قالاسى «بايقوڭىر» اۋدانى № 2-سوتى ايىپتاۋ ۇكىمىن شىعارعان ەدى.