عىلىم جانە جوعارى ءبىلىم مينيسترلىگى قانشا مىڭ گرانتتىڭ ءوز يەسىن تاپقانىن ايتتى
بۇل تۋرالى ق ر عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى ەرجان امىربەك ۇلى ايتتى، دەپ حابارلايدى قازاقپارات ءتىلشىسى.
«قازىرگى تاڭدا وقۋعا قابىلداۋ پروتسەسى ءجۇرىپ جاتىر. قانشا ستۋدەنتتىڭ گرانتقا قابىلدانعانى تۋرالى ناقتى اقپاراتتى 25- تامىزعا قاراي بەرەمىز. وزدەرىڭىز بىلەسىزدەر، بيىل مەملەكەت باسشىسىنىڭ تاپسىرماسىمەن قوسىمشا 88 مىڭعا جۋىق گرانت ءبولىندى. ونىڭ كوبى ءوز يەگەرىن تاپتى. ال ءارى قاراي وسى گرانتتىڭ قالعان بولىگىن تاعايىنداۋ، اقىلى بولىمگە قابىلداۋ جۇمىستارى قازىر جالعاسىپ جاتىر»، - دەدى ول ب ا ق وكىلدەرىنىڭ سۇراعىنا بەرگەن جاۋابىندا.
سونداي-اق، ۆەدومستۆو وكىلى وقۋ مەن جاتاقحانا باعاسى ءمينيستردىڭ ءجىتى باقىلاۋىندا ەكەنىن ايتىپ، اتا-انالارعا قاتتى قوبالجىماۋعا كەڭەس بەردى.
«جالپى اتا-انالاردىڭ قاتتى قوبالجۋىنا سونشالىق نەگىز جوق. سەبەبى بۇل ماسەلەلەردىڭ ءبارىن عىلىم جانە جوعارى ءبىلىم ءمينيسترى ءجىتى قاداعالاپ وتىر. سوندىقتان مينيسترلىك تە، جوعارى وقۋ ورىندارى دا باعا ساياساتىنا بايلانىستى، ستۋدەنتتەردىڭ تۇرمىس-تىرشىلىگىنە بايلانىستى بۇكىل تاپسىرمالاردى قاداعالاپ وتىرادى»، - دەدى ەرجان امىربەك ۇلى.
سونداي-اق، ول كەيبىر ۇلتتىق ۋنيۆەرسيتەتتەردە وقۋ اقىسى نەگە قىمباتتاعانىن ءتۇسىندىردى.