ۋنيۆەرسيتەتتەر جاتاقحانا اقىسىن ستۋدەنتتىڭ كەلىسىمىنسىز كوتەرە المايدى - مينيسترلىك
«جوعارى وقۋ ورنىنداعى ۇلكەن ماسەلەنىڭ ءبىرى - شالعاي اۋىل، اۋدانداردان كەلگەن بالالاردى جاتاقحانامەن قامتاماسىز ەتۋ. بۇل باعىتتا ۇلكەن جۇمىستار اتقارىلىپ جاتىر. قازىرگى تاڭدا ۇكىمەتتىڭ بەرگەن ارنايى تاپسىرماسى بار. سوعان سايكەس، جىلىنا قوسىمشا 10 مىڭ جاتاقحانا ورىنى قولدانىسقا بەرىلىپ وتىرۋى كەرەك. بيىلدىڭ وزىندە وسى تاپسىرما اياسىندا ءبىرقاتار جاڭا نىسان اشىلىپ وتىر»، - دەگەن مينيسترلىك وكىلى جاتاقحانا اقىسىن كوتەرۋدىڭ ءوز ءتارتىبى بار ەكەنىن ەسكە سالدى.
«باعا ساياساتىنا كەلسەك، جاتاقحانا اقىسى ەلەۋلى تۇردە وسپەيدى. مەندەگى مالىمەت بويىنشا، وڭىرلەردەگى وقۋ ورىندارىندا جاتاقحانا اقىسى شامامەن 10 مىڭ تەڭگەنىڭ اينالاسىندا، ودان كوپ ەمەس. ال جەكەلەگەن وقۋ ورىندارىندا باعا كوتەرىلسە، قوسىمشا قىزمەتتەر ەنىپ، سونىڭ قۇنى قوسىلسا، كەلىسىمشارت نەگىزىندە عانا باعا وزگەرۋى مۇمكىن. ۋنيۆەرسيتەت ءبىرجاقتى شەشىم ەشقاشان قابىلدامايدى. وعان تالاپكەر نەمەسە ستۋدەنت سول باعامەن كەلىسىپ، قول قويعاننان كەيىن عانا جاتاقحاناعا ورنالاستىرىلادى»، - دەدى ەرجان امىربەك ۇلى.
سونداي-اق، ول كەيبىر ۇلتتىق ۋنيۆەرسيەتتەردە وقۋ اقىسى نەگە قىمباتتاعانىن ءتۇسىندىردى.