ۇلتتىق ۋنيۆەرسيتەتتەردە وقۋ باعاسى وسە مە - مينيسترلىكتىڭ جاۋابى

نۇر-سۇلتان. قازاقپارات – ق ر عىلىم جانە جوعارى ءبىلىم مينيسترلىگى ۇلتتىق ۋنيۆەرسيتەتتەردە وقۋ باعاسى كوتەرىلەتىنى تۋرالى اقپارات بويىنشا مالىمدەمە جاسادى، دەپ حابارلايدى قازاقپارات ءتىلشىسى.

ب ا ق وكىلدەرىنىڭ سۇراعىنا جاۋاپ بەرگەن عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى ەرجان امىربەك ۇلى 1- قىركۇيەكتەن باستاپ ۇلتتىق ۋنيۆەرسيتەتتەردە وقۋ باعاسى وسپەيتىنىن رەسمي مالىمدەدى.

«ءبىرىنشى قىركۇيەكتەن باستاپ عىلىم جانە جوعارى ءبىلىم ءمينيسترى ساياسات نۇربەك ۇلىنىڭ مالىمەدمەسىنە ساي، ەشقانداي دا وقۋ باعاسى كوتەرىلمەيتىنىن مالىمدەيمىز. ياعني، باعا بىلتىرعى دەڭگەيدە قالادى. وسى نۇسقاۋدى ۋنيۆەرسيەتتەردىڭ ءبارى قابىلدادى.

شىن مانىندە جەكەلەگەن ۋنيۆەرسيتەتتەردە مەملەكەتتەگى بەلگىلەنگەن ينفلياتسيا دەڭگەيىنە بايلانىستى ديففەرەنتسياتسيا بولدى. ءبىراق ول بەلگىلەنگەن ينفلياتسيا دەڭگەيىنەن اسقان جوق. مۇنىڭ ءبارى ءبىر كۇندە شەشىلە سالاتىن ماسەلە ەمەس. جالپى كەز كەلگەن ۋنيۆەرسيتەتتە وقۋ اقىسىنىڭ كوتەرىلۋى نەمەسە تومەندەۋى ديرەكتورلار كەڭەسىنىڭ شەمىمىمەن، قۇرىلتايشىلاردىڭ شەشىمىمەن عانا ىسكە اسادى. سونداي-اق، ول بويىنشا ءبىر اي نەمەسە ءبىر كۇندە ەمەس، بىرنەشە ايدا شەشىم شىعادى. سەبەبى ولار نارىقتاعى جاعدايدى، ستۋدەنتتەردىڭ تولەم قابىلەتىن، ۋنيۆەرسيتەتتىڭ دامۋ ستراتەگياسىن ەلەپ-ەسكەرە وتىرىپ شەشىم قابىلداۋى كەرەك»، - دەپ ءتۇسىندىردى ۆەدومستۆو وكىلى.

ايتۋىنشا، باعا ساياساتى ەرتە كوكتەمدە نەمەسە جىلدىڭ باسىندا قابىلدانعان شەشىمدەر بويىنشا ايقىندالادى.

«شىلدە ايىندا مينيستر ساياسات نۇربەك ۇلى وقۋ اقىسىن كوتەرىلمەيتىنى تۋرالى مالىمدەمە جاسادى. ول مالىمدەمە ءتيىستى ۋنيۆەرسيەتتەردىڭ بارىنە ناقتى تاپسىرما رەتىندە، نۇسقاۋ رەتىندە ايتىلدى. سول كەزدەن بەرى ەشقانداي ۋنيۆەرسيەتتە وقۋ باعاسى وسكەن جوق. سىزدەر سۇراپ وتىرعان ۋنيۆەرسيتەتتەردىڭ بارىندە جىلدىڭ باسىندا باعا ديففەرەنتسياتسياسى بولعان. ۋنيۆەرسيتەت وزدىگىنەن ءبىر كۇندە باعانى وزگەرتۋ تۋرالى شەشىم قابىلداي سالا المايدى. سەبەبى ول ستۋدەنت پەن ءبىلىم بەرەتىن مەكەمە اراسىندا كەلىسىمشارت جاسالادى. ودان كەيىن باعا ديففەرەنتسياتسياسى بىلتىرى تۇسكەن نەمەسە الدىڭعى جىلى تۇسكەن ستۋدەنتتەرگە عانا بايلانىستى بولۋى مۇمكىن.

كەلىسىمشارتتى قاراساڭىزدار، كوبىندە وقۋ جىلى بىتكەننەن كەيىن كەلەسى وقۋ ءۇردىسى باستالماس بۇرىن مەملەكەتتەگى ينفلياتسيا دەڭگەيىندە باعا ديففەرەنتسياتسياسى بولۋى مۇمكىن دەگەن تارماق بولادى.

تىكەلەي مينيسترلىكتىڭ قاراۋىنداعى ۋنيۆەرسيەتتەردە، سونىڭ ىشىندە ۇلتتىق ۋنيۆەرسيتەتتەردە باعا ساياساتى وزگەرگەن جوق. ال جەكەلەگەن ۋنيۆەرسيتەتتەر باعا ساياساتىن نارىقتاعى جاعدايعا سايكەس ۇلعايتىپ جىبەرسە، ونى ديرەكتورلار كەڭەسىنىڭ شەشىمىمەن قايتا قاراۋعا مۇمكىندىك بار ەكەنىن ايتقىم كەلەدى»، - دەدى ەرجان امىربەك ۇلى.