ءار قازاقتىڭ جۇرەگىندە «اتامەكەنگە قونىس اۋدارساق» دەگەن ارمان جۇرەتىنى جاسىرىن ەمەس - ازيا چەمپيوناتىنىڭ ەكى دۇركىن كۇمىس جۇلدەگەرى

اتىراۋ. قازاقپارات - جاقىندا اتىراۋلىق دزيۋدوشى ءابيبا ءابۋجاقىنوۆا نۇر- سۇلتان قالاسىندا وتكەن ازيا چەمپيوناتىنىڭ كۇمىس جۇلدەگەرى اتاندى. بۇل - ونىڭ قۇرلىقتىق دوداداعى العاشقى جەڭىسى ەمەس.

«قاي جارىسقا بارسام دا، الدىمەن ەلدىڭ ابىرويىن، قازاقتىڭ نامىسىن قورعايمىن دەپ اتتانامىن. الدا دا قازاق ەلىنىڭ، قازاقتىڭ ابىرويىن اسقاقتاتا بەرەمىن»، - دەيدى ول. دزيۋدوشى بويجەتكەن وسى جانە وزگە دە سايىستارداعى جەڭىسى تۋرالى قازاقپارات تىلشىسىنە اڭگىمەلەپ بەردى.

ءابيبا ءابۋجاقىنوۆا 1997 -جىلى وزبەكستان رەسپۋبليكاسىنىڭ تاشكەنت وبلىسىنداعى شىرشىق قالاسىندا دۇنيەگە كەلگەن. اناسىنىڭ كەڭەسىمەن بالا كۇنىندە كوركەم گيمناستيكامەن شۇعىلدانا باستاعان. الايدا، ونىڭ قالاۋى ءبىر جىلدان سوڭ دزيۋدوعا اۋعان.

- كوركەم گيمناستيكادان دزيۋدوعا اۋىسۋىڭا نە سەبەپ بولدى؟

- دزيۋدوعا قىزىعىپ، ءوز قالاۋىممەن اۋىستىم. بۇعان مەنى ەشكىم ءماجبۇر ەتكەن جوق. ءتىپتى، ماعان دزيۋدوعا اۋىسۋ تۋرالى ەشكىم كەڭەس بەرمەدى. نەگە ەكەنىن بىلمەيمىن، ءوزىم دزيۋدوعا اۋىسقىم كەلدى. ءبىراق، مەنىڭ بۇل تاڭداۋىمدى اكە- شەشەم باستاپقىدا قولدادى دەپ ايتا المايمىن. ويتكەنى، ولار «بۇل - قىز بالاعا ءتان سپورت ەمەس. ۇلدارمەن بىرگە الىسىپ- جۇلىسىپ جۇرەسىڭ بە؟ قول- اياعىڭدى اۋىرتىپ الاسىڭ عوي» دەپ قارسىلىعىن ءبىلدىردى. ارينە، ولاردىڭ بۇل قارسىلىعى ماعان جاناشىرلىعىنان تۋىنداعانىن بىلەمىن. سولاي بولا تۇرسا دا، مەن ءوز تاڭداۋىمنان اينىماي، دزيۋدومەن اينالىسۋدى توقتاتپادىم.

- العاشقى باپكەرىڭ كىم ەدى؟

- دزيۋدونىڭ قىر- سىرىن ۇيرەتكەن العاشقى باپكەرىم - باقىتجان جۇمانوۆ. وزبەكستاندا تۇراتىن قازاق باپكەرى مەنىڭ وسى سپورتتاعى جەتىستىگىمنىڭ باستاۋىن سالىپ بەردى. ويتكەنى، ونىڭ كەڭەسىمەن، ۇيرەتۋىمەن جارىستاردان العاش رەت جۇلدەلى ورىنداردى يەلەندىم. بۇل اكە- شەشەمنىڭ دزيۋدوعا دەگەن كوزقاراسىن تۇبەگەيلى وزگەرتتى.

- قازاق ەلىنە قاشان كوشىپ كەلدىڭ؟

- الەمنىڭ ءار قيىرىندا تۇرىپ جاتقان ءار قازاقتىڭ جۇرەگىندە «اتامەكەنگە قونىس اۋدارساق» دەگەن ارمان جۇرەتىنى جاسىرىن ەمەس. سول ارمان جەتەگىمەن 2014 -جىلى شىمكەنت قالاسىنا كوشىپ كەلدىك. الماتىداعى رەسپۋبليكالىق سپورت كوللەدجىنە وقۋعا قابىلداندىم. كەزىندە ازيا ويىندارىنىڭ، قۇرلىق چەمپيوناتىنىڭ جۇلدەگەرى بولعان دزيۋدوشى، قازىر بىلىكتى باپكەر نۇربول سۇلەيمەنوۆتىڭ قاراۋىندا جاتتىعا باستادىم. سوڭعى جىلدارى اتىراۋ قالاسىنا اۋىستىم. قازىرگى باپكەرىم - مەيىرجان ەسماعامبەتوۆ.

- قازاقستانعا كوشىپ كەلگەننەن كەيىن جاستار اراسىندا الەم بىرىنشىلىگىنىڭ كۇمىس جۇلدەگەرى اتاندىڭ عوي. التىن مەدال الۋىڭا نە كەدەرگى بولدى؟

- ءيا، بۇل دودا 2017 -جىلى حورۆاتيانىڭ استاناسى زاگرەب قالاسىندا وتكەن ەدى. بۇل - مەنىڭ حالىقارالىق دودادا قول جەتكىزگەن العاشقى جەتىستىگىم. سول سەبەپتەن، ونى ۇمىتا المايمىن. زاگرەبتەگى الەم چەمپيوناتىندا حورۆاتيا، رەسەي، بەلگيا جانە برازيليانىڭ بالۋاندارىنان باسىم ءتۇستىم. الايدا، اقتىق سىندا جاپون بويجەتكەنىنەن ۇتىلىپ قالدىم. بۇعان ءوزىمنىڭ قاتەلىگىم سەبەپ بولدى. ءبىراق، سول كەزدە تىك تۇرىپ كۇرەسۋ كەزىندە قارسىلاستارىما «اۋىرتۋ» ءادىسىن قولدانعان ەدىم. كەيىننەن بۇل ءادىستى دزيۋدو كۇرەسىنەن الىپ تاستادى.

- وتكەن جىلى بىشكەكتە وتكەن ازيا چەمپيوناتىنىڭ كۇمىس جۇلدەسىن يەلەندىڭ. جەڭىسكە ءبىر تابان جاقىن تۇر ەدىڭ ...

- بارلىق سپورتشى مۇنداي چەمپيوناتقا چەمپيون اتانۋدى ماقسات ەتىپ بارادى عوي. مەندە دە سونداي ماقسات بولعانىن جاسىرمايمىن. ءتىپتى، ءۇمىتىم زور ەدى. اقتىق سىنعا دەيىن قارسىلاستارىمنىڭ ءبارىن ۇتتىم. ءبىراق، اقتىق سىندا لي ياناننان جەڭىلدىم. ول - مىقتى بالۋان. باستاپقىدا ۇپاي سانى مەنىڭ ەنشىمدە بولاتىن. ءوزىم بولماشى قاتەلىك جىبەرىپ الدىم. قىتاي بالۋانى بۇل ءساتتى وڭتايلى پايدالانىپ كەتتى.

- ال، جاقىندا نۇر- سۇلتان قالاسىندا وتكەن ازيا چەمپيوناتىندا چەمپيون اتاناتىن مۇمكىندىگىڭ بولدى عوي. ءبىراق...

- قاي جارىسقا بارسام دا، الدىمەن ەلدىڭ ابىرويىن، قازاقتىڭ نامىسىن قورعايمىن دەپ اتتانامىن. الدا دا قازاق ەلىنىڭ، قازاقتىڭ ابىرويىن اسقاقتاتا بەرەمىن.

ال، بيىلعى ازيا چەمپيوناتىنىڭ ءجونى بولەك. الدىمەن، بۇل دودا ەلوردامىزدا ءوتتى. ەكىنشىدەن، ماعان ازيا چەمپيونى اتاناتىن ءسات تۋعان ەدى. تايپەيلىك لين چەن- حاو مەن موڭعوليا بالۋانى نارانتسەتسەگ گانبااتاردى ۇتىپ، اقتىق سىنعا جاقسى دايىنىقپەن كەلدىم. الايدا، جاپون بالۋانى ۆاكانا كوگا باسىمدىعىن تانىتتى. جاپون سپورتشىسىن جەڭۋىم مۇمكىن ەدى. ويتكەنى، ونىڭ سولاقاي بالۋانمەن كەزدەسسە، ابدىراپ قالاتىنىن بايقاپ ءجۇرمىن. مەن دە سولاقايمىن. سوعان قاراماستان، ول مەنىڭ جوسپارىمدى ىسكە اسىرۋعا مۇمكىندىك بەرمەدى. قول سوزىم جەردە تۇرعان التىن مەدالعا يە بولا المادىم. ءسويتىپ، ەكىنشى رەت ازيا چەمپيوناتىنىڭ كۇمىس جۇلدەگەرى اتاندىم.

- اڭگىمەڭە راحمەت!

اۆتور

بەك مۇستافا