قايىرشىنىڭ ءومىرىن وزگەرتكەن راۋشان گۇلى
گۇل ساتۋشى قىز ويلانباستان جولدىڭ قارسى بەتىندە كۇنى بويى جاردەم تىلەپ وتىرعان قايىرشىعا وسى سوڭعى گۇلدى سىيلاپ، ءوز جونىنە كەتە بارادى. قايىرشى ءوزى ءوز بولعالى مۇنداي وقيعاعا جولىعىپ كورمەپتى. ول ءۇش ۇيىقتاسا دا ارمانىنداعىداي ارۋ قىزدىڭ وزىنە گۇل سىيلايتىنىن ويلاپ كورمەپتى. بۇل كۇنى قايىرشى ءۇشىن كۇن باتىستان شىققانداي بولادى. قايىرشى ومىرىندە بىردە- ءبىر رەت ءوزىن ايالاپ، ءسۇيىپ كورمەپتى، باسقالاردىڭ دا ايالاۋى مەن سۇيۋىنە قول جەتكىزەمىن دەپ ۇمىتتەنبەسە كەرەك، بۇگىنگى جاعداي وعان قاتتى اسەر ەتەدى.
گۇلدى الا سالىسىمەن قالا ماڭىنداعى ءوزىنىڭ لاشىعىنا تارتادى. ۇيىنە كەلگەن سوڭ سىنىق قۇمىرا تاۋىپ، وعان سۋ تولتىرىپ، گۇلدى وعان سالىپ قويادى. ول ءۇن- ءتۇنسىز گۇلگە قاراپ وتىرادى. كەنەت ورىننان اتىپ تۇرىپ، الگى قۇمىرانى جۋىپ، تازالاپ، ءموپ- ءمولدىر سۋ قۇيىپ گۇلدى قايتا سالادى. ول ىشتەي: «مۇنداي ادەمى گۇل قالايشا كىر- كىر قۇمىرادا تۇرادى ەكەن، مەن ونى جۋىپ- تازالاپ قويدىم» دەپ ماساتتانادى.
قايىرشى اسەم گۇلگە تاعى قۇمارتا قاراپ وتىرادى. ول اقىرىن قوزعالىپ كەلىپ، گۇل قۇمىراسى تۇرعان ۇستەلدى قولىمەن سيپاپ قاراپ ەدى، شاڭ- توزاڭنان كورىنبەي قالىپتى. اسەم گۇلدىڭ تۇرۋىنا بۇل ۇستەل لايىق ەمەس دەپ ويلاعان ول ۇستەلدى دە جۋىپ، ايناداي ەتىپ قويادى.
گۇلگە قۇمارتا قاراعان سايىن تازا ۇستەل مەن نارتتاي قىزىل راۋشان ساعىمى ويناپ تۇرعان ءمولدىر قۇمىرا مەن سۋعا مىنا بىلىققان لاشىق مۇلدەم ساي كەلمەيتىن سياقتى بولىپ كورىندى. ول بار پەيىلىمەن ءوزىنىڭ جىلدار بويى تۇرىپ كەلە جاتقان كۇركەسىن جيناستىرىپ، ءسۇرتىپ، تازالاپ ابىگەرگە ءتۇستى. كەنەت ول ءوزىنىڭ ۇنەمى ۇڭىرەيىپ تۇراتىن بولمەسىنە جىلىلىق تولىپ، جايلى ءومىردى وزىنە تىم جاقىن سەزىندى. ول بولمەنىڭ ءدال ورتاسىندا تۇرىپ بۇرىشتاعى سىنىق اينادان ءوزىنىڭ كەيپىن كوردى. قىزىل شۇعىلا توگىپ تۇرعانداي بولىپ كورىنگەن روزا گۇلىنە، تازا ۇستەلگە، مۇنتازداي ۇيدە تۇرىپ ول ءوزىن مۇلدە قوراش كەلبەتتە كوردى. شاشى وسكەن، كيىمىنىڭ البا- جۇلباسى شىققان. ول بۇگىنگى بار تاپقان- تايانعانىن الىپ جۋىنۋعا كەتتى.
ومىرىندە ءدال بۇگىنگىدەي راحاتتانىپ كورمەگەن شىعار. جۇقا بولسا دا تازا كيىم ساتىپ الدى، ساقال- مۇرتىن قىردى، شاشىن تاراپ رەتكە كەلتىردى. الەۋمەتتىك مونشانىڭ ەسىگىنەن شىعىپ بارا جاتىپ قابىرعاداعى اينادان مۇلدە باسقا ادامدى، جاستىق وتى جالىنداعان كەلبەتتى جىگىتتى كوردى. «مەن نە ءۇشىن قايىرشى بولىپ ءومىر ءسۇرۋىم كەرەك؟» دەپ سۇرادى وزىنەن. بۇل ونىڭ قايىرشى بولعاننان بەرى قارايعى وزىنە تۇڭعىش رەت وسىلايشا سۇراق قويۋى ەدى. جىگىتتىڭ رۋحى ءاپ- ساتتە سەرگىپ شىعا كەلدى. ول ۇيىنە كەلىپ مۇنداعى بارلىق دۇنيەگە سونشالىقتى ريزا پەيىلمەن سۇيسىنە قارادى. ەكىنشى كۇننەن باستاپ باسقا جۇمىس ىزدەۋگە كىرىستى. جولى بولعىش ەكەن، جايلى جۇمىستى دا تاپتى. كۇندەر زۋلاپ، ايلار اۋناپ جاتتى. بىرنەشە جىلدان كەيىن ول تابىسقا جەتكەن ادامعا اينالدى. ۇلكەن كومپانيا قۇرىپ، قالتالىلار قاتارىنا قوسىلدى. بۇل وقيعا ونى ادام جاس كۇنىندە ءوز ىشكى الەمىندەگى تۇنەككە تۇنشىعىپ، ءومىرىنىڭ كوركەم كوكجيەگىن كورۋدەن ماقۇرىم قالماۋى كەرەك دەگەن ويعا جەتەلەدى. پەندە بالاسى وزىنە تيەسەلى راۋشان گۇلىن تاپقانشا تەڭىزدەگى باعدارسىز مالتىققان دارمەنسىز سۋشىعا ۇقسايتىن سياقتانادى.
وزىڭىزگە كىشكەنتاي وزگەرىس جاساڭىز، ءسىز وزگەرسەڭىز، ءسىزدىڭ الەمىڭىز دە وزگەرەدى. ەگەر ءسىز وسى راۋشان گۇلىن تاپقان بولساڭىز، ونى باسقالارعا بەرۋدى دە ەستەن شىعارماڭىز.
Massaget.kz