جەكە تۇلعالاردىڭ بانكروتتىعى جاپپاي سيپات الا قويمايدى - ەكونوميست
«حالىقتىڭ ىشىندە بانكروتتىعىن راسىمدەگىسى كەلەتىنىن ايتۋشىلار كوپ. شىن مانىندە ولپروتسەدۋرا سونشالىق وڭاي بولمايدى. وڭاي بولماعانى دۇرىس تا. ويتكەنى بانكروتتىق دەگەن وڭاي راسىمدەي سالاتىن شارا بولماۋى كەرەك. بانكروتتىق - باسقا امال قالماعان كەزدەگى اقىرعى قادام. ياعني، نەسيەنى تولەگىسى كەلمەيتىندەر ەمەس، شىنىمەن دە تولەي المايتىندار بانكروتتىق راسىمدەۋى كەرەك. سوندىقتان حالىق جاپپاي بانكروتتىق راسىمدەيدى دەپ ويلامايمىن»، - دەدى ساراپشى.
ايتۋىنشا، زاڭ قابىلدانعاننان كەيىن پروبلەمالى نەسيەنى بەرگەن ەكىنشى دەڭگەيدەگى بانكتەر ءبىرشاما شىعىن كورەدى.
«ويتكەنى بۇعان دەيىن كەشىرىلگەن نەسيەلەر بيۋجەت ەسەبىنەن وتەلسە، بۇل پروتسەستە ولاي بولمايدى. الايدا بانكروتقا تولەنبەي كەتكەنىنە 5 جىلدان اسقان نەسيەلەر جاتادى. ال ونداي نەسيەنىڭ باسىم بولىگى ەسەپتەن شىعارىلعان. مەنىڭ ويىمشا، بۇل زاڭنىڭ قابىلدانۋى بانكتەردىڭ بورىشكەرلەرگە دەگەن تالابىن ءبىرشاما قاتاڭداتادى. بانكروتتىق راسىمدەگەن بورىشكەرگە كەيىن بانكتەر تىم تالاپشىل بولادى. ونىڭ نەسيە تولەۋ قابىلەتتىلىگىن مۇقيات قاراپ، جالپى نەسيە وتىنىمدەردى ماقۇلداۋ كەزىندە بارىنشا ساق بولادى. بەرەتىن نەسيە سوماسىن دا ويلانىپ بارىپ بەكىتەدى. ءبىراق اۋقىمدى وزگەرىس بولا قويمايدى. ويتكەنى بانكروتتىق جاپپاي سيپات الا قويمايتىنىن جوعارىدا ايتتىم. ول پروتسەستىڭ قيىن وتەتىنىن كورگەن تالاي ادامنىڭ قازىرگى كوڭىلى سۋ سەپكەندەي باسىلۋى مۇمكىن»، - دەدى اندرەي چەبوتاريەۆ.
ەسكە سالساق، بانكروتتىق راسىمدەگەن ازاماتتار 5 جىل كولەمىندە بانكتەر مەن ميكروكرەديتتىك ۇيىمداردان قارىز الا المايدى.
اتالعان زاڭ جوباسىندا جەكە تۇلعانىڭ بانكروتتىعىن راسىمدەۋدىڭ ءۇش جولى ۇسىنىلعان.
سونداي-اق بورىشىن وتەي الماعانى ءۇشىن سوت ارقىلى بانكروتتىق راسىمدەگەن ازاماتتار ءاربىر ارەكەتىن قارجىلىق باسقارۋشىلاردىڭ نۇسقاۋىمەن جاسايدى.