ۇلتتىق بانكتىڭ اتىن جامىلعان الاياقتار كوبەيگەن
بۇل تۋرالى قازاقپارات بانكتىڭ باسپا ءسوز قىزمەتىنە سىلتەمە جاساپ حابارلايدى.
قاسكويلەر ءتۇلى سايت قۇرىپ، جارنامالىق روليكتەر، سونداي- اق، قۇرىلعىعا قوندىرىپ الۋدى ۇسىناتىن ءموبيلدى قوسىمشالار جاساۋعا بەيىمدەلگەن.
الاياقتىقپەن اينالىساتىن مۇنداي رەسۋرستار ەكىنشى دەڭگەيلى بانكتەرمەن، ۇلتتىق بانكپەن نەمەسە باسقا دا مەملەكەتتىك ورگاندارمەن ازىرلەنگەن جەكە تۇلعالاردىڭ قاراجاتىن باسقارۋعا سالۋ سەكىلدى باعدارلامالارعا قاتىسۋعا ۇندەيدى.
«ۇلتتىق بانك جەكە تۇلعالاردىڭ شوتىنا قىزمەت كورسەتپەيدى، اقشالاي ەسەپ ايىرىسۋلار مەن مامىلەلەر جاساسپايدى، سول سياقتى تابىس تابۋعا نەگىزدەلگەن قانداي دا ءبىر پلاتفورمالاردى ازىرلەۋگە قاتىسپايدى.
الاياقتاردىڭ سايتىندا ءوتىنىش قالدىرعان كەز كەلگەن ينتەرنەت- قولدانۋشى اقشاسىنان ايىرىلاتىنداي تاۋەكەلگە بارادى: الاياقتار ونىڭ جەكە دەرەكتەرىن قولعا تۇسىرەدى، تەلەفون ارقىلى حابارلاسىپ، اقشانى ءوز رەكۆيزيتتەرىنە اۋدارىپ الۋدىڭ ايلاسىنا كىرىسەدى. ال، ولاردىڭ قولىنا تۇسكەن قاراجاتتى كەرى قايتارۋ پروتسەدۋراسى ۇزاق تا كۇردەلى بولادى، ال كەي جاعدايدا قايتپاي قالىپ جاتادى. سويتە تۇرا، سالىنعان سوممانى كەرى قايتارۋ ءۇشىن الاياقتار قولدانۋشىنى قوسىمشا اقشا سالۋعا تاعى ماجبۇرلەۋى مۇمكىن» ، - دەلىنگەن حابارلامادا.
الاياقتاردى قالاي انىقتاۋعا بولادى:
· ونداي سايتتار از ۋاقىت ىشىندە ينۆەستيتسيادان كوپ ءارى تۇراقتى پايدا تابۋعا كەپىلدىك بەرەدى؛
· قانداي دا ءبىر بايلانىس دەرەگى بولمايدى؛
· رەسمي مەملەكەتتىك تۇلعالاردىڭ، مەملەكەتتىك ورگاندار مەن ۇلتتىق كومپانيا باسشىلارىنىڭ فوتوسۋرەتتەرى مەن ويدان قۇراستىرىلعان مالىمدەمەلەرى كەلتىرىلەدى؛ جالعان ليسەنزيالاردى نەمەسە قۇقىق بەلگىلەيتىن قۇجاتتاردى پايدالانادى؛
· مەملەكەتتىك ورگانداردىڭ، ەكىنشى دەڭگەيلى بانكتەردىڭ نەمەسە ۇلتتىق كومپانيالاردىڭ لوگوتيپتەرى مەن اتاۋلارى شىن بولۋى مۇمكىن. الايدا، ول زاڭدى تۇلعالاردىڭ، ونىڭ ىشىندە ۇلتتىق بانكتىڭ مۇنداي الاياقتاردىڭ پلاتفورماسىنا قاتىسى جوق.
جاريالانعان اقپاراتتى، سىرتتان تۇسەتىن سۇراۋلاردى نەمەسە قاندايدا دا ءبىر ارەكەتكە قويىلاتىن تالاپتاردى تەكسەرۋ ءۇشىن قارجى ينستيتۋتىنىڭ نەمەسە بانكتىڭ رەسمي نومىرىنە قوڭىراۋ شالۋ كەرەك، ال كۇمان كۇشەيگەن جاعدايدا قارجى مەكەمەسىنە بارىپ، ونىڭ قىزمەتكەرىمەن سويلەسۋ كەرەك.
اكتيۆتەردى ينۆەستيتسيالىق باسقارۋعا ليسەنزياسى بار ۇيىمداردىڭ ءتىزىمى قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگىنىڭ رەسمي سايتىندا جاريالانعان.