كۋبادا نايزاعاي ءتۇسىپ، مۇناي قويماسى جارىلدى
09:46, 08 - تامىز 2022
نۇر- سۇلتان. قازاقپارات - كۋبادا نايزاعاي ءتۇسىپ، مۇناي قويماسى جارىلدى. ءورت تۇندە نايزاعاي كەزىندە باستالىپ، شيكى مۇنايى بار 8 رەزەرۆۋاردىڭ ەكەۋىن شارپىعان، دەپ حابارلايدى قازاقپارات Euronews.com اگەنتتىگىنە سىلتەمە جاساپ.
كۋبانىڭ ماتانساس قالاسىنداعى مۇناي قويماسىندا بولعان جارىلىستار لەگىنەن جانە ءورت سالدارىنان 120 دان استام ادام جاراقات الدى. قازا تاپقاندار مەن حابار- وشارسىز كەتكەندەر دە بار. ءورت سوندىرۋشىلەر ءبىر تاۋلىكتەن استام ۋاقىت بويى وتتى سوندىرۋگە تىرىسۋدا.
سەنبىدە ۆەنەسۋەلا ۇكىمەتى كۋباعا ءورت سوندىرۋشىلەر مەن ارنايى تەحنيكا جىبەرگەن بولاتىن. ورتكە نايزاعايدىڭ سوعۋى سەبەپ بولىپ وتىر.