ەلوردادا وزبەكستاننان كەلگەن جۇرگىزۋشى جول پوليتسەيىنە پارا بەرمەك بولدى
«قاۋىپسىز جول» جەدەل الدىن الۋ شاراسىن وتكىزۋ بارىسىندا پوليتسەيلەر جول ەرەجەسىن بۇزعانى ءۇشىن وزبەكستان ازاماتى تىزگىندەگەن «ۆاز 2115» ماركالى اۆتوكولىكتى توقتاتتى.
اكىمشىلىك جاۋاپكەرشىلىكتەن قۇتىلۋعا تىرىسقان جۇرگىزۋشى پاترۋلدىك پوليتسەيگە 5 مىڭ تەڭگە ۇسىنعان. 27 جاستاعى جۇرگىزۋشى ءىس-ارەكەتىنىڭ زاڭسىزدىعىن ەسكەرتكەنىنە قاراماستان، پاترۋل كولىگىنىڭ سالونىنا اقشانى قالدىرعان، سودان كەيىن ۇستالعان. ءتارتىپ بۇزۋشىنىڭ زاڭسىز ارەكەتى پوليتسەيدىڭ قىزمەتتىك بەينەتىركەگىشىنە جازىلىپ قالعان.
ق ر ق ك 367-بابى بويىنشا سوتقا دەيىنگى تەرگەۋ باستالدى. كۇدىكتى ءوز كىناسىن تولىق مويىندادى.
نۇر-سۇلتان قالاسىنىڭ پوليتسيا دەپارتامەنتى لاۋازىمدى تۇلعاعا پارا بەرۋ - قىلمىستىق جاۋاپكەرشىلىككە اكەپ سوعاتىنىن، ياعني ايىپپۇل تۇرىندە نەمەسە بەس جىلعا دەيىن باس بوستاندىعىنان ايىرا وتىرىپ، مۇلكىن تاركىلەپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرۋ كوزدەلگەنىن ەسكەرتەدى.