قانداي وليمپيادا مەن جارىستاردىڭ جەڭىمپازى ءبىلىم گرانتتارىن الادى

نۇر-سۇلتان. قازاقپارات – ق ر وقۋ-اعارتۋ مينيسترلىگى جەڭىمپازدارى جوعارى وقۋ ورنىنىڭ گرانتىن الاتىن حالىقارالىق وليمپيادالاردىڭ، سپورتتىق جارىستار مەن ونەر بايقاۋلارىنىڭ ءتىزىمىن جاريالادى، دەپ حابارلايدى قازاقپارات ءتىلشىسى.

قۇجاتتىڭ تولىق اتاۋى - سوڭعى ءۇش جىلداعى جەڭىمپازدارى مەن جۇلدەگەرلەرى (ءبىرىنشى، ەكىنشى جانە ءۇشىنشى دارەجەلى ديپلومدارمەن ماراپاتتالعان) جوعارى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىنا ءبىلىم بەرۋ گرانتى بەرىلە وتىرىپ قابىلداناتىن، جالپى ءبىلىم بەرەتىن پاندەر بويىنشا حالىقارالىق وليمپيادالاردىڭ جانە ورىنداۋشىلاردىڭ حالىقارالىق كونكۋرستارىنىڭ، سپورتتىق جارىستاردىڭ تىزبەسىن جانە ولاردى ىرىكتەۋ ولشەمشارتتارىن بەكىتۋ تۋرالى قازاقستان رەسپۋبليكاسى وقۋ-اعارتۋ ءمينيسترىنىڭ 2022-جىلعى 15 - شىلدەدەگى 326№ بۇيرىعى.

اتالعان بۇيرىق جوباسى بويىنشا، مىنا وليمپيادالاردىڭ، سپورتتىق جارىستار مەن كونكۋرستاردىڭ جۇلدەگەرلەرى جوعارى وقۋ ورىندارىندا بيۋجەت ەسەبىنەن وقۋعا مۇمكىندىك الادى:

وليمپيادالار:

ماتەماتيكادان حالىقارالىق وليمپيادا (International Mathematical Olympiad)؛

فيزيكادان حالىقارالىق وليمپيادا (International Physics Olympiad)؛

حيميادان حالىقارالىق وليمپيادا (International Chemistry Olympiad)؛

بيولوگيادان حالىقارالىق وليمپيادا (International Biology Olympiad)؛

گەوگرافيادان حالىقارالىق وليمپيادا (International Geography Olympiad)؛

ينفورماتيكادان حالىقارالىق وليمپيادا (International Olympiad in Informatics)؛

لينگۆيستيكادان حالىقارالىق وليمپيادا (International Linguistic Olympiad).

حالىقارالىق سپورت جارىستارى:

وليمپيادا ويىندارى؛

پاراليمپيادا ويىندارى؛

سۋردليمپيادا ويىندارى؛

جاس وسپىرىمدەردىڭ وليمپيادا ويىندارى؛

وليمپيادالىق سپورت تۇرلەرى بويىنشا الەم چەمپيوناتتارى؛

دۇنيەجۇزىلىك جازعى جانە قىسقى گيمنازيادا.

حالىقارالىق ورىنداۋشىلاردىڭ كونكۋرستارى:

پەتر چايكوۆسكي اتىنداعى حالىقارالىق جاس وسپىرىمدەر بايقاۋى (ماسكەۋ قالاسى، رەسەي فەدەراتسياسى)؛

حالىقارالىق جاس وسپىرىمدەر ۆوكالدىق كونكۋرسى (ماسكەۋ قالاسى، رەسەي فەدەراتسياسى)؛

ەكاتەرينا ماكسيموۆا اتىنداعى «ارابەسك» اشىق رەسەيلىك بالەت ارتىستەرىنىڭ بايقاۋى (پەرم قالاسى، رەسەي فەدەراتسياسى)؛

World Dance Council، World DanceSport Federation حالىقارالىق فەدەراتسياسىنىڭ جارىستارى مەن تۋرنيرلەرى، International Dance Sport Union؛

الەم كۋبوگى مەن الەم چەمپيوناتىنىڭ كەزەڭدەرى «ۆيتەبسكىدەگى سلاۆيان بازارى» حالىقارالىق ونەر فەستيۆالى (بەلارۋس رەسپۋبليكاسى)؛

بيبىگۇل تولەگەنوۆا اتىنداعى حالىقارالىق ۆوكاليستەر كونكۋرسى (الماتى قالاسى، قازاقستان).

بۇيرىقتىڭ 2№ قوسىمشاسىندا اتالعان سايىستارعا ىرىكتەۋدىڭ ولشەمشارتتارى دا بەرىلگەن.

«وسى بۇيرىق العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى»، - دەپ جازىلعان قۇجاتتا.

دەمەك، بۇيرىق 5- تامىزدا كۇشىنە ەنەدى. سوڭعى دەرەك بويىنشا، بيىل ەلىمىزدە 80 مىڭعا جۋىق تالاپكەر ءبىلىم گرانتىن تاعايىنداۋ كونكۋرسىنا قاتىسىپ جاتىر.