قاسىم-جومارت توقايەۆ ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەستى
15:40, 23 - شىلدە 2022
نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەستى، دەپ حابارلايدى اقوردانىڭ باسپا ءسوز قىزمەتى.
ۋكراينا تاراپىنىڭ باستاماسىمەن وتكەن اڭگىمەلەسۋ بارىسىندا قاسىم-جومارت توقايەۆ پەن ۆلاديمير زەلەنسكي ءبىرىن-ءبىرى ەكى ەل اراسىنداعى ديپلوماتيالىق قاتىناستاردىڭ 30 جىلدىعىمەن قۇتتىقتادى.
بۇل اتاۋلى كۇن 23 - شىلدەدە اتاپ وتىلەدى.
قاسىم-جومارت توقايەۆ وسى كەزەڭ ىشىندە ەكونوميكالىق جانە گۋمانيتارلىق سالالارداعى ەكىجاقتى ىنتىماقتاستىقتى دامىتۋدا ماڭىزدى ءارى وڭ ناتيجەلەرگە قول جەتكىزىلگەنىن اتاپ ءوتتى.
قازاقستان پرەزيدەنتى ب ۇ ۇ- نىڭ كومەك كورسەتۋىمەن ۋكراينا استىعىن ەكسپورتتاۋ جونىندەگى تۇركيادا قول جەتكىزىلگەن ءۇشجاقتى كەلىسىمگە وڭ باعا بەردى.
سونىمەن قاتار مەملەكەت باسشىسى ۋكرايناداعى جاعدايدى ديپلوماتيالىق جولمەن رەتتەۋگە قاتىستى قازاقستاننىڭ تۇبەگەيلى ۇستانىمىن راستادى.