بۇرشاق، شاڭدى داۋىل، جاڭبىر - سارسەنبىگە ارنالعان اۋا رايى
سولتۇستىك- باتىس سيكلونىنىڭ جىراسى ق ر تەرريتورياسىنىڭ باسىم بولىگىندە نايزاعايمەن جاڭبىر، جەلدىڭ كۇشەيۋىن، سولتۇستىك- باتىستا بۇرشاق، وڭتۇستىك پەن وڭتۇستىك- باتىستا شاڭدى داۋىل الىپ كەلەتىن بولادى.
تەك ەلىمىزدىڭ وڭتۇستىگى مەن وڭتۇستىك- شىعىسىندا انتيسيكلون جوتاسى جاۋىن- شاشىنسىز اۋا رايىن ساقتايتىن بولادى. تۇركىستان، قىزىلوردا، جامبىل وبلىستارىنىڭ باسىم بولىگىندە، اتىراۋ، وبلىسىنىڭ وڭتۇستىگىندە، باتىس قازاقستان وبلىسىنىڭ وڭتۇستىك- باتىسىندا توتەنشە ءورت قاۋپى كۇتىلەدى.
كۇندىز تۇركىستان، ماڭعىستاۋ، اقتوبە، ۇلىتاۋ وبلىستارىنىڭ باسىم بولىگىندە، الماتى، جەتىسۋ وبلىستارىنىڭ باتىسىندا، باتىس قازاقستان، اتىراۋ، قوستاناي، قاراعاندى وبلىستارىنىڭ وڭتۇستىگىندە، اقمولا وبلىسىنىڭ وڭتۇستىك- باتىسىندا قاتتى ىستىق كۇتىلەدى. كۇندىز قىزىلوردا، جامبىل وبلىستارىنىڭ باسىم بولىگىندە، ماڭعىستاۋ، ۇلىتاۋ وبلىستارىنىڭ وڭتۇستىگىندە وتە قاتتى ىستىق كۇتىلەدى.