شەتەلدەگى قازاق بالالارىنا ارنالعان جازعى لاگەر اشىلدى
«وتانداستار قورى» كوممەرتسيالىق ەمەس اكسيونەرلىك قوعامى مۇرىندىق بولعان شارانىڭ اشىلۋ سالتاناتى بۇگىن ءوتتى، دەپ حابارلايدى قازاقپارات.
«وتانداستار قورىنىڭ» باسپا ءسوز قىزمەتىنەن حابارلاعانداي، لاگەر اقمولا وبلىسى بۋراباي اۋدانى شۋچە كولىنىڭ وڭتۇستىك شىعىس جاعالاۋىندا ورنالاسقان «yQanat High School of Burabay» مەكتەبىنىڭ بازاسىندا ۇيىمداستىرىلعان.
«قازاقتىڭ ۇلى اقىنى اباي قۇنانباي ۇلىنىڭ تۇجىرىمداماسىنا ساي تالاپ، ەڭبەك، تەرەڭ وي، قاناعات، راقىم قۇندىلىقتارىنا نەگىزدەلگەن بۇل لاگەرگە فرانسيا، تۇركيا، يران، قىرعىزستان، قىتاي، موڭعوليا، وزبەكستان، رەسەيدەن 84 قازاق بالاسى كەلىپ قاتىسۋدا. سونىمەن قاتار، قازاقتىڭ ۇلتتىق بولمىسى، سالت-ءداستۇر، ونەرى مەن زاماناۋي ءبىلىم، عىلىم تەندەنتسيالارىن ونىڭ ىشىندە STEM، روبوتوتەحنيكا، كاسىپكەرلىك، جوبالاردى باسقارۋ داعدىلارى ۇشتاستىرعان»، - دەلىنگەن باسپا ءسوز بايانىندا.
اشىلۋ سالتاناتىندا «وتانداستار قورىنىڭ» پرەزيدەنتى ابزال ساپاربەك ۇلى قاتىسۋشىلاردى بالالار جىلىمەن قۇتتىقتاپ، اتاجۇرتقا كەلىپ الاڭسىز بوي سەرگىتىپ، وي جيناقتاپ، تاماشا دەمالىس وتكىزۋىنە تىلەكتەس ەكەنىن جەتكىزگەن.
«ءار ەلدەن كەلىپ، ءتۇرلى تىلدەردە سويلەپ وسكەن جاس وسپىرىمدەر جينالا قالسا، ءبىرىن ءبىرى تەك قازاق تىلىندە سويلەگەندە عانا تۇسىنە الادى. وسىلايشا تاجىريبە جيناپ قازاق تىلىنە دەگەن قۇشتارلىقتارى ويانۋدا» دەيدى قوعام پرەزيدەنتى.
شەتەلدەگى قازاق بالالارىنا ارنالعان جازعى لاگەرلەر 2019-جىلى باستاۋ العان ەدى. سول جىلى 5 ءتۇرلى باعىتتا جازعى دەمالىس ۇيىمداستىرىلىپ، 600 گە جۋىق شەتەلدەگى قازاق بالاسى قازاقستانعا كەلگەن بولاتىن.
ەكى جىل پاندەميا كەسىرىنەن ۇيىمداستىرىلماعان بۇل شارا بيىلدان باستاپ قايتا جۇزەگە اسا باستادى.