ءتۇن ىشىندە تىرناق الۋعا بولا ما

نۇر-سۇلتان. قازاقپارات - ەل اراسىندا تىرناق الۋعا بولمايتىن بەلگىلى كۇندەر بارى ايتىلادى.

مىسالى، سەيسەنبى، سارسەنبى كۇندەرى جانە تۇندە تىرناق الماعان دۇرىس دەگەن سوزدەر دە بار. شاريعات بويىنشا بۇل قانشالىقتى دۇرىس ەكەنى Ihsan.kz سايتىندا جاريالاندى.

شاريعات بويىنشا تىرناقتى اپتانىڭ قاي كۇنى الام دەسەڭىز دە، ءوز ەركىڭىز. ءبىراق جۇما كۇنى نامازعا دەيىنگى ۋاقىت ىشىندە تىرناق الۋدى ادەتكە اينالدىرۋ - مۇستاحاب (ۇنامدى امال). ولاي بولعان سەبەبى، حاديسشى ءبايھاقي كىتابىندا پايعامبارىمىزدىڭ (س. ع. س) جۇما كۇنى نامازدان بۇرىن تىرناعىن الىپ، مۇرتىن قىسقارتاتىندىعى ايتىلادى.

تىرناق استىنا قانشاما ميكروبتار مەن كىر جينالاتىندىقتان، قاجەتتىلىك تۋىنداعان جاعدايدا قانداي كۇن ەكەنىنە قاراماستان الىپ وتىرعان دۇرىس. مەيلى سەيسەنبى، سارسەنبى بولسىن، ءتىپتى تۇندە دە تىرناق الۋعا بولادى. تۇندە تىرناق الماۋ دەگەن ءسوز جارىق جوق كەزدەرى دەنەڭدى جاراقاتتاپ الماۋ ءۇشىن ايتىلسا كەرەك. تاعى ءبىر ۇنامدى ارەكەت - الىنعان تىرناقتى كومۋ. ويتكەنى، پايعامبارىمىز (س. ع. س) الىنعان تىرناق پەن شاشتى كومۋدى كەڭەس ەتكەن. تىرناقتى، ابزالى اپتاسىنا ءبىر رەت الىپ تۇرۋ كەرەك. ال قىرىق كۇننەن اسسا - حارامعا جاقىن بولىپ ەسەپتەلىنەدى. تىرناق الۋ ادەبى بويىنشا، اۋەلى وڭ قولدىڭ سۇق ساۋساعىنان باستاپ، رەتىمەن ورتاڭعى، اتى جوق جانە شىناشاق، ەڭ سوڭىندا باس بارماعىنىڭ تىرناعى الىنادى. سول قولى شىناشاعىنان باستاپ، رەتىمەن باس بارماعىنىڭ تىرناعىن الۋمەن اياقتالادى. اياق تىرناقتارىن وڭ اياعىنىڭ كىشكەنتاي باشپايىنان باستاپ، رەتىمەن الادى. سول اياعىنىڭ تىرناعىن، كەرىسىنشە، ۇلكەن باشپايىنان باستاپ، كىشكەنتاي باشپايىنان اياقتايدى.