ۇكىمەت ازىق- تۇلىك باعاسىن تۇراقتاندىرۋ ءۇشىن قانداي جۇمىستار اتقارىپ جاتىر
بۇل تۋرالى ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى. «بۇل ينفلياتسيانىڭ قارقىندى ءوسۋ ماسەلەسى دۇنيەجۇزىندە بولىپ جاتقان جاعداي. مىسالى ا ق ش-تا باعالاردىڭ ءوسۋى 8,8 پايىزدى، ەۋرووداق مەملەكەتتەرىندە - 8,6 پايىزدى قۇراپ وتىر. كورشىلەس ەلدەردە دە باعا وسۋدە. ب ۇ ۇ جانىنداعى ازىق-تۇلىك ۇيىمىنىڭ دەرەكتەرى بويىنشا، دۇنيەجۇزىندە ازىق- تۇلىك باعاسى ءبىر جىلدا 34 پايىزعا وسكەن»، - دەدى ءاليحان سمايىلوۆ ۇلتتىق ارنادا «جاڭا قازاقستان» باعدارلاماسىندا.
پرەمەر-ءمينيستردىڭ ايتۋىنشا، بۇل جاعداي پاندەميادا باستالدى، سودان كەيىن ءتۇرلى گەوساياسي جاعدايلار بولدى. ءار مەملەكەت ءتۇرلى شەكتەۋلەر قويىپ، لوگيستيكا ماسەلەلەرى تۋىنداپ، وسىنىڭ نەگىزىندە الەم بويىنشا باعا وسۋدە.
«بىزدە دە ينفلياتسيا دەڭگەيى قازىر 14,5 پايىزدى قۇرادى. ءبىراق دەگەنمەن ءبىز باعالاردىڭ نەگىزسىز وسۋىنە جول بەرمەۋ ءۇشىن جانە ءارى قاراي ارزانداتۋ ءۇشىن ارنايى ينفلياتسياعا قارسى ءىس- قيمىل جوسپارىن قابىلداپ، جىل باسىنان بەرى ىسكە اسىرىپ كەلەمىز. ونىڭ ەڭ ءبىرىنشى جۇيەلى شاراسى - ىشكى نارىقتى تولىعىمەن وتاندىق ونىممەن قامتاماسىز ەتۋ. ول ءۇشىن ءبىز جىل باسىنان بەرى اۋىل شارۋاشىلىعىنا كورسەتىلەتىن قارجىلاي كومەكتى ەكى ەسەگە ۇلعايتتىق. مىسالى كوكتەمگى ەگىس پەن كۇزگى جيناۋ جۇمىستارىنا قارجىنى 70 ميللياردتان 140 ميللياردقا جەتكىزدىك. فورۆاردتىق ساتىپ الۋ شارالارىنا قاراجاتتى 40 ميللياردتان 80 ميللياردقا دەيىن ۇلعايتتىق» ، - دەدى ءا. سمايىلوۆ. جالپى بيىل اۋىل شارۋاشىلىعىنا دەگەن قاراجات كولەمى 300 ميلليارد تەڭگە بولسا، كوكتەمدە بيۋدجەتتى ناقتىلاعان كەزدە ونى ەكى ەسەگە ۇلعايتقان.
«سونىمەن بىرگە ءبىز اپتا سايىن ۇكىمەتتە سەلەكتر رەجيمىندە بۇل ماسەلەنى وڭىرلەرمەن بىرگە تالقىلايمىز. تاعى دا بىرنەشە جەدەل شارالار قابىلداۋدامىز. ول بىرىنشىدەن، ساۋدا- ساتتىققا بايلانىستى كەيبىر كەدەرگىلەردى جويۋ. ەكىنشىدەن، تۇراقتاندىرۋ قورلارىنا قوسىمشا قاراجات ءبولىپ، سول قورلاردى وڭىرلەردە قۇرۋ. اينالىم سحەماسى دەگەن ارنايى ءتاسىل بار. سونىڭ ناتيجەسىندە وتاندىق ءونىم شىعارۋشىلار ءبىزدىڭ ساۋدا جۇيەلەرىن تۇراقتى باعامەن ءتيىستى ازىق- تۇلىكتى قامتاماسىز ەتەدى. وعان قوسا، مونوپولياعا قارسى رەتتەۋ شارالارىن كۇشەيتۋدەمىز. بىلتىر زاڭناماعا ارنايى الەۋمەتتىك تاۋارداعى ساۋدا ۇستەمەسى 15 پايىزدان اسپاۋى كەرەك دەگەن نورمانى قابىلدادىق. ءاربىر ساۋدا ورتالىعىندا سول نورمانىڭ مونيتورينگىن كۇشەيتۋدەمىز. وسىنىڭ بارلىعى باعالاردى تۇراقتاندىرۋعا وڭ ىقپالىن تيگىزەدى دەپ ويلايمىز»، - دەدى ۇكىمەت باسشىسى.