رەسەيدەگى گەوساياسي وقيعالار قازاقستانعا قالاي اسەر ەتتى - پرەمەر-مينيستر
«ەڭ بىرىنشىدەن، رەسەي ءبىزدىڭ ۇلكەن كورشى مەملەكەت، ءبىزدىڭ ساۋدا-ەكونوميكالىق سەرىكتەسىمىز. سوندىقتان ءبىز بۇل مەملەكەتپەن ءارى قاراي ىنتىماقتاستىقتى ۇلعايتامىز. بىزدە رەسەيمەن تاريحي جانە ساۋدا-ەكونوميكالىق بايلانىستارىمىز وتە تىعىز. رەسەيدە بولعان ءارتۇرلى جاعداي ارينە، بىزگە ءوزىنىڭ اسەرىن تيگىزەدى. مىسالى، بيىلعى جىلدىڭ باسىندا گەوساياسي وقيعالار بولدى. بۇل ماسەلەلەر بىزگە تىكەلەي اسەرىن تيگىزىپ جاتىر. سوندىقتان ءبىز ءتيىستى داعدارىسقا قارسى ءىس شارالار كەشەنىن قابىلدادىق»، - دەدى ۇكىمەت باسشىسى ۇلتتىق ارناداعى «جاڭا قازاقستان» باعدارلاماسىندا.
پرەمەردىڭ ايتۋىنشا، قازاقستاننىڭ جىل سوڭىنا دەيىنگى ناقتى ءىس-شارالارى بار. ول جۇيەلى جانە جەدەل شارالار.
«مىسالى ۇلتتىق بانكپەن بىرلەسكەن شارالار شەڭبەرىندە ءبىز تەڭگەنىڭ ايىرباس باعامىن تۇراقتاندىرۋ بويىنشا ءبىرقاتار شەشىم قابىلدادىق. مىسالى تەڭگەلىك دەپوزيتتەردى قولداۋ، مەملەكەتتەن شەتەل ۆاليۋتاسىن شىعارۋعا شەكتەۋ قويۋ، سونىڭ ارقاسىندا قازىر وزدەرىڭىز كورىپ وتىرسىزدار، تەڭگەنىڭ ايىرباس باعامى سالىستىرمالى تۇردە تۇراقتى بولىپ وتىر. ينفلياتسياعا قارسى كەشەندى شارالار جوسپارىن قابىلدادىق. قازىر ينفلياتسيا بارلىق جەردە بايقالىپ وتىر. دەگەنمەن ءبىز كۇندەلىكتى مونيتورينگ جۇرگىزىپ، ءتيىستى شارالاردى قابىلداپ جاتىرمىز»، - دەدى ءا. سمايىلوۆ.
سونىمەن بىرگە، پرەمەر-ءمينيستردىڭ ايتۋىنشا، ساۋدا-ساتتىققا بايلانىستى لوگيستيكالىق ماسەلەلەر تۋىنداپ جاتىر.
«سوڭعى ءبىر مىسال – ك ت ك مۇناي قۇبىرى بويىنشا نوۆوروسيسكتەگى اۋداندىق سوت 5 - شىلدە كۇنى ك ت ك جۇمىسىنا ءبىر ايعا شەكتەۋ قويدى. 6 - شىلدە كۇنى ءبىز رەسەيلىك ارىپتەسىمىز - ۇكىمەت توراعاسىمەن بايلانىسىپ، سول كۇنى ماسەلەنى شەشتىك. ك ت ك قۇبىرىنىڭ جۇمىسى شتاتتىق رەجيمدە ءجۇرىپ جاتىر. مۇناي ەكسپورتىنا ەشقانداي شەكتەۋ قويىلعان جوق. سونداي ماسەلەلەر كۇندەلىكتى تۋىندايدى، ءبىز بۇل ماسەلەلەردى شەشۋ ءۇشىن كورشىلەس ەلدەردىڭ ۇكىمەت باسشىلارىمەن تىعىز بايلانىستامىز، كۇندەلىكتى پروبلەمالاردى جەدەل تۇردە شەشۋگە شارا قابىلداۋدامىز. بۇل - جەدەل شارالار»، - دەدى ق ر پرەمەر-ءمينيسترى.