قازاق حالقىنداعى نەكە تويلارىن بىلەسىز بە؟

نۇر-سۇلتان. قازاقپارات – ەكى جاستىڭ ۇيلەنگەنىنەن باستاپ، جاس كەلىننىڭ بالانى دۇنيەگە اكەلگەسىن جاسالاتىن قالجا توي، شىلدەحانا، بەسىك توي، تۇساۋكەسەر، سۇندەت توي ت. ب. تويلاردىڭ تۇرلەرى كوپ.

قازاق داستۇرىندە ەرلى- زايىپتىلاردىڭ نەكەسىن قيىپ، شاڭىراق كوتەرىپ، وتاۋ قۇرعاسىن بەلگىلى ءبىر ۋاقىتتاردا اتاپ وتەتىن تويلارى بولادى. ەلوردا ينفو سايتى وتباسىلىق ومىردەگى نەكە تويلارىنىڭ تۇرلەرىن توقتالادى.

توي - قازاق حالقى ءۇشىن قۋانىش، شاتتىق، اق داستارقان جايىپ، تۋعان- تۋىسىنىڭ باسىن قوسىپ، باتاسىن الۋ.

قازاقتىڭ ءومىرى - توي. ەكى جاستىڭ ۇيلەنگەنىنەن باستاپ، جاس كەلىننىڭ بالانى دۇنيەگە اكەلگەcىن جاسالاتىن قالجا توي، شىلدەحانا، بەسىك توي، تۇساۋكەسەر، سۇندەت توي ت. ب. تويلاردىڭ تۇرلەرى كوپ.

سونىمەن قاتار، قازاقتا نەكە تويلارىنىڭ دا بىرنەشە ءتۇرى بار. ۇيلەنۋ تويى - ەكى جاستىڭ، ولاردىڭ اتا- انالارىنىڭ ومىرىندەگى قۋانىشتى وقيعا، ادامدار اراسىنداعى جۇبايلىق قارىم- قاتىناستىڭ باستالۋى، جۇرتقا جاريا ەتۋ سالتاناتى. ال ەندى ۇيلەنگەننەن كەيىنگى ەرلى- زايىپتىلاردىڭ وتباسىلىق ومىردەگى نەكە تويلارىنا كەلسەك.

1 جىل. شىت توي - وتباسى قۇرعاننان كەيىنگى ءبىر جىل وتكەن سوڭ اتالىنادى. بۇل كۇنى ەرلى- زايىپتىلار ءبىر- بىرىنە شىت ورامال سىيلايدى.

5 جىل. اعاش توي - وتباسىلىق ءومىردىڭ بەسجىلدىعىنا وراي اتالىپ وتىلەدى. بۇل كۇنى ەرلى- زايىپتىلار ءبىر- بىرىنە اعاشتان جاسالعان بۇيىمدار سىيلايدى.

10 جىل. راۋشان توي - ونجىلدىق باس قوسۋ مەرەكەسى. بۇل كۇنى قوناققا دوستارى شاقىرىلادى، بارلىعى قولدارىنا راۋشان گۇلىن ۇستاپ بيلەيدى.

15 جىل. اينەك توي - ون بەس جىلدىق توي. بۇل كۇنگى سىيلىق شىنىدان ىستەلگەن بۇيىمدار بولۋى شارت. اينەك - ەرلى- زايىپتىلار قارىم- قاتىناسىنىڭ مولدىرلىگىنىڭ كۋاسى بولماق.

20 جىل. فارفور توي - جيىرما جىلدان كەيىن اتالىپ وتىلەدى. شاقىرىلعان مەيماندارعا فارفوردان جاسالعان جاڭا ىدىستارعا سالىنىپ تاراتىلادى. بۇل ەسكى ىدىس- اياقتاردان ەشتەڭە قالعان جوق دەگەننىڭ يشاراتى بولماق.

25 جىل. كۇمىس توي - جيىرما بەس جىلدان كەيىن اتالماق. بۇل كۇنى نەكەلىك التىن ساقينانىڭ قاسىنا كۇمىس ساقينا قوسىلۋى كەرەك.

30 جىل. ءىنجۋ توي - وتىز جىلدان كەيىنگى توي. بۇل كۇنى كۇيەۋى ايەلىنە القا سىيلاۋى كەرەك، بۇل وتكەن كۇندەردىڭ ءبارىنىڭ دە ىنجۋدەي تارتىمدى بولعانىنىڭ كۋاسى بولماق.

35 جىل. كەنەپ توي - وتىز بەس جىلدان كەيىن تويلانادى. وندا كەنەپتەن تىگىلگەن زاتتار سىيلانىپ، كەنەپ داستارقان جايىلادى.

40 جىل. لاعىل توي - قىرىق جىل وتكەننەن كەيىنگى مەرەكە. بۇل كۇنى سىيلانعان التىن ساقيناعا ماحاببات پەن جالىننىڭ بەلگىسى - لاعىل ورناتىلعان بولۋى شارت.

50 جىل. التىن توي - ەلۋ جىلدىق تورقالى توي. نەكەلىك التىن ساقينالار جاڭا ساقينالارمەن اۋىستىرىلادى.

60 جىل. گاۋحار توي - وتاسقانعا الپىس جىل وتكەندە تويلانادى. بۇنى اتاپ ءوتۋ - ەندىگى جەردە نەكەنى ەشكىم بۇزا المايدى دەگەن ۇعىمعا سايادى.

65 جىل. تەمىر توي - ەرلى- زايىپتىلىق ءومىردىڭ الپىس بەس جىلدىعىندا وتەدى.

67,5 جىل. تاس توي - بۇل تويدىڭ ەرەكشەلىگى نەكە قيىلعانىنا الپىس جەتى جارىم جىل وتكەندە اتالىپ وتىلەدى.

70 جىل. يگىلىكتى توي - جەتپىس جىل وتكەندە تويلانادى.

75 جىل. تاجدىك توي - ەڭ سوڭعى توي بولىپ ەسەپتەلەدى، جەتپىس بەس جىل وتكەندە اتالىپ وتىلەدى.

توي تويعا ۇلاسسىن، تويشىل قاۋىم!