بالاباقشاعا ءۇش جىلدان ارتىق بارعان بالانىڭ ۇلگەرىمى قاتارلاستارىنان باسىم بولادى - اسحات ايماعامبەتوۆ

نۇر-سۇلتان. قازاقپارات - وقۋ-اعارتۋ ءمينيسترى اسحات ايماعامبەتوۆ مەكتەپكە دەيىنگى كەزەڭدە بالانى ەرتە دايىنداۋ مەن دامىتۋدىڭ ماڭىزدىلىعى تۋرالى ويىمەن ءبولىستى، دەپ حابارلايدى قازاقپارات.

ءمينيسترلىڭ پايىمىنشا، ەرتە دامۋدىڭ ماڭىزدى ەكەنىن ەلەۋسىز قالدىرۋعا بولمايدى. بالانىڭ ميى تەز دامىپ، نەگىزگى داعدىلار مەن مىنەز- قۇلىق قاسيەتتەرى قالىپتاسادى، سونىمەن قاتار ول بالانىڭ دەنساۋلىعىنا نەگىز بولادى. مەكتەپكە دەيىنگى مەكەمەگە بارۋ بالانىڭ بويىندا ءوزىن-ءوزى رەتتەۋ، جاڭا ورتاعا بەيىمدەلۋ جانە توپتا جۇمىس ىستەۋ سياقتى ءبىرقاتار پايدالى ماشىعىن دامىتۋعا كومەكتەسەدى.

اسحات قانات ۇلى وسى ماشىقتىڭ بارلىعى بالانىڭ مەكتەپتە ۇلكەن جەتىستىككە جەتۋىنە ىقپال ەتەتىنى دالەلدەنگەن ەرتە وقىتۋ ادەبيەتىنە شولۋدى ۇسىنعان.

«حالىقارالىق زەرتتەۋلەردىڭ ناتيجەلەرى بالاباقشاعا بارعان جانە ەرتە جاستان جازۋ مەن ساناۋدى ۇيرەنگەن بالالار مەكتەپتە ۇلگەرىمى بويىنشا ءوز قاتارلاستارىنان باسىم بولاتىنىن كورسەتەدى. مىسالى، PISA-2018 دەرەكتەرى بويىنشا ءۇش جىلدان استام بالاباقشاعا بارعان وقۋشىلار مەكتەپكە دەيىنگى ۇيىمدارعا بارماعاندارعا قاراعاندا جوعارى ناتيجە كورسەتەدى: وقۋ ساۋاتتىلىعى بويىنشا 20 ۇپايعا جانە ماتەماتيكا مەن جاراتىلىستانۋ ساۋاتتىلىعى بويىنشا 16 ۇپايعا. سونىمەن قاتار TIMSS زەرتتەۋىنىڭ ناتيجەلەرى دە بالاباقشاعا بارعان وقۋشىلاردىڭ جاقسى ناتيجە كورسەتكەنىن دالەلدەدى. مىسالى، بالاباقشاعا بارماعان 4-سىنىپ وقۋشىلارى مەن وعان ءۇش جىلدان استام بارعاندار اراسىنداعى ايىرماشىلىق ماتەماتيكادان 16 بالل، ال جاراتىلىستانۋ ءپانى بويىنشا بالاباقشاعا بارعانداردا 23 بالل بولدى. ال اتا-انالارى مەكتەپكە دەيىن جازۋدى، وقۋدى جانە ساناۋدى ۇيرەتكەن 4-سىنىپ وقۋشىلارى اتا-انالارى اندا- ساندا عانا وقۋىنا كوڭىل بولگەن بالالارعا قاراعاندا ماتەماتيكادان 15 ۇپايعا جانە جاراتىلىستانۋ پانىنەن 25 ۇپايعا جوعارى العان»، - دەپ جازدى مينيستر.

ەرتە دامىتۋ مەن مەكتەپكە دەيىنگى ءبىلىم بەرۋمەن قامتۋ ەلىمىزدىڭ ەكونوميكالىق كورسەتكىشتەرىنە اسەرى جاعىنان دا ماڭىزدى. نوبەل سىيلىعىنىڭ لاۋرەاتى د. حەكماننىڭ الەۋمەتتىك وسال وتباسىلاردان شىققان بالالاردىڭ مەكتەپكە دەيىنگى بىلىمىنە جۇمسالعان ءبىر دوللاردىڭ ەكونوميكالىق قايتارىمى تۋرالى تۇجىرىمدارى كەڭ تارالعان. ول مەملەكەتكە 8 (6) دوللار پايدا اكەلەدى. زەرتتەۋلەرگە سايكەس، بولاشاقتا بالانىڭ كورسەتكىشتەرىنە اسەر ەتەتىن ماڭىزدى كريتەري - ول مەكتەپكە دەيىنگى ۇيىمنىڭ ساپاسى. «ياعني مەكتەپكە دەيىنگى كەزەڭدەگى بالانىڭ جاعدايى مەن ءبىلىم بەرۋدىڭ كەيىنگى كەزەڭدەرىندە دامۋى ءۇشىن ونىڭ ەرتە جاستان دامۋىنا نازار اۋدارۋ ماڭىزدى ەكەنىن كورىپ وتىرمىز»، - دەپ تۇيىندەيدى اسحات ايماعامبەتوۆ.