پسيحولوگتار دەنەسىنە سۋرەت سالدىرۋعا دەگەن ۇمتىلىستى ولاردىڭ باسقالاردان ەرەكشەلەنۋ ءتاسىلى رەتىندە قاراستىرادى، ءبىراق باسقا سەبەپتەر بار. مىسالى، نەمىس عالىمدارى بالا كەزىندە زورلىق- زومبىلىققا ۇشىراعاندار تاتۋدى ءجيى سالدىراتىنىن انىقتادى. تاتۋيروۆكاسى بار ادامدار باسقالارعا قاراعاندا اۋىر پسيحولوگيالىق پروبلەمالارعا ءجيى ۇشىرايدى ەكەن.
BMC Psychology جۋرنالىندا جاريالانعان زەرتتەۋ بالالىق شاعى قيىن بولعان ادامدار تاتۋيروۆكالار مەن پيرسينگتەرگە كوبىرەك بەيىم ەكەنىن كورسەتتى. ءبىراق ونىڭ دا ءوز ەسكەرتپەلەرى بار.
نەلىكتەن ادامدار تاتۋيروۆكا سالدىرادى
دەنەدەگى تاتۋيروۆكانى كوپتەگەن عاسىرلار بۇرىن ادامدار دەنەنى ەرەكشە كورسەتۋ ءۇشىن كەيدە بەلگىلى ءبىر نارسەلەردى ەسكەرتۋ ءۇشىن سالدىرعان. ال، قازىر ادامدار قوعامنان ەرەكشەلەنۋ ءۇشىن تاتۋعا اۋەس كەلەدى. كەيبىر ادامدار ءومىردىڭ اۋىر كەزەڭىنەن، كۇيزەلىستەن وتكەسىن تاتۋ سالدىرىپ جاتادى.
وسى تاقىرىپ بويىنشا كەيىنگى زەرتتەۋلەردىڭ ءبىرىن گەرمانياداعى يوحاننەس گۋتەنبەرگ اتىنداعى ماينتس ۋنيۆەرسيتەتىندەگى مارەيك ەرنست جانە ونىڭ ارىپتەس پسيحولوگتارى جۇرگىزدى. ولار 14 پەن 44 جاس ارالىعىنداعى ادامدارمەن سۇحباتتاسقان.
ساۋالناماعا قاتىسۋشىلار وزدەرىنىڭ تاتۋيروۆكاسى مەن پيرسينگتەرى تۋرالى ايتىپ، بالالىق شاق پەن پسيحولوگيالىق جاراقات تۋرالى سۇراقتارى بار ساۋالنامانى تولتىردى.
تاتۋيروۆكا - وتكەننەن جانە اينالاعى قوعامنان دەرەك بەرەدى
ساۋالناماعا قاتىسۋشىلاردىڭ شامامەن 25 پايىزى بالا كەزىندە وعان كوپ كوڭىل بولىنبەگەنىن اتاپ وتكەن.
«ال، 48 پايىز قاتىسۋشى بالالىق شاعىندا زورلىق- زومبىلىق قۇربانى بولعانىن ايتتى»، - دەلىنگەن زەرتتەۋدە.
عالىمدار ادامنىڭ تاتۋيروۆكاسى نەمەسە پيرسينگتەرى نەعۇرلىم كوپ بولسا، بالالىق شاعىندا زورلىق- زومبىلىق سوعۇرلىم اۋىر بولعان دەگەن قورىتىندىعا كەلدى.
«ءبىزدىڭ زەرتتەۋىمىز حالىقتىڭ رەپرەزەنتاتيۆتى ۇلگىسىندە تاتۋيروۆكالار مەن پيرسينگتەردىڭ بالالىق شاقتاعى زورلىق- زومبىلىق جانە نەمقۇرايلىلىقپەن بايلانىسىن راستاۋ ارقىلى الدىڭعى زەرتتەۋلەردى تولىقتىرادى. سونىمەن قاتار، ءبىز بالالىق شاقتاعى فيزيكالىق جانە جىنىستىق زورلىق- زومبىلىق تۋرالى عانا ەمەس، سونىمەن بىرگە ەرتە ەموتسيونالدىق جاراقات - ەرەسەكتەردىڭ بالاعا دەگەن نەمقۇرايلى قارىم- قاتىناسى تۋرالى ايتىپ وتىرمىز»، - دەيدى زەرتتەۋشىلەر.
عالىمدار تاتۋيروۆكا نەمەسە پيرسينگ جاساۋعا دەگەن ۇمتىلىس - دەنەنىڭ كەز كەلگەن بولىگىنە وزگەرتۋ جاساۋ بالالىق شاقتاعى قيىندىقتاردى جەڭۋدىڭ جانە ءوزىن تولىق تاۋەلسىز سەزىنۋدىڭ قۇرالى بولۋى مۇمكىن دەگەن قورىتىندىعا كەلدى.
زەرتتەۋشىلەر «ولاردىڭ قورىتىندىلارى تاتۋيروۆكاسى بار كەز كەلگەن ادامنىڭ بالالىق شاعى قيىن بولعانىن بىلدىرمەيدى» دەدى.
اقپارات دەرەككوزى: https://massaget.kz