سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى ولجاس بەكتەنوۆ ۆەدومستۆونىڭ القا وتىرىسىندا وسىنداي پىكىر ايتتى، دەپ حابارلايدى قازاقپارات ءتىلشىسى.
«سيفرلاندىرۋ سالاسىنا جۇرگىزىلگەن مونيتورينگ وتاندىق اقپاراتتىق تەحنولوگيالار نارىعىن مەملەكەتتىك ورگاندارمەن ۇلەستەس كومپانيالار مونوپوليالاپ العانىن كورسەتتى. قاجەتسىز جانە ءبىر- ءبىرىن قايتالايتىن باعدارلامالار ازىرلەۋ تىيىلماي تۇر. مەملەكەت بالانسىنداعى ءاربىر ءۇشىنشى اقپاراتتىق جۇيە ەسەپتەن شىعارۋعا جاتادى»، - دەدى اگەنتتىك ءتوراعاسى.
ونىڭ ايتۋىنشا، بۇرىننان قولدانىلىپ كەلە جاتقان اقپاراتتىق جۇيەنى جاڭادان جاسالعان رەسۋرس رەتىندە ساتىپ جىبەرەتىن «تابىسقويلار» بار كورىنەدى. «قولدانىستا جۇرگەن تەحنولوگيالار جاڭا ازىرلەمە رەتىندە ساتىلىپ ءجۇر. مەملەكەت سيفرلاندىرۋعا 400 ميلليارد تەڭگەدەن استام قاراجات جۇمسادى. جىل سايىن جۇيەلەردى كۇتىپ- باپتاۋعا 20 ميلليارد تەڭگەدەن استام قاراجات بولىنەدى. مەملەكەتتىك ورگاندار اگەنتتىكتىڭ ۇسىنىمدارىن ورىنداپ، سالاداعى شىعىندار وڭتايلانادى جانە وتاندىق IT نارىقتىڭ بارلىق قاتىسۋشىسىنا تەڭ جاعداي جاسالادى دەپ كۇتەمىز»، - دەدى ولجاس بەكتەنوۆ.
سىبايلاس جەمقورلىققا قارسى قىزمەت مامانى جەمقورلىق فاكتىسى تۋرالى شاعىمدى زاڭدى تۇردە قاراۋعا مىندەتتى.
«جازادان بۇلتارتپاۋ پرينسيپىن ەشكىم الىپ تاستاماعانىن اتاپ وتكىم كەلەدى. جانە دە جەمقورلىق فاكتىسى تۋرالى شاعىم نەمەسە بەلگى تۇسكەن جاعدايدا كەز كەلگەن قىزمەتكەر زاڭدى تۇردە قارالۋىن جانە قابىلداناتىن ءىس- شارانىڭ تولىققاندى بولۋىن قامتاماسىز ەتۋگە مىندەتتى. ءبىز جۇمىسىمىزدا وسى ءادىستى قولدانۋدى باستاپ كەتتىك. وڭىرلىك دەپارتامەنتتىڭ باسشىلارى ەسەپ بەرۋ باياندامالارى كەزىندە سيفرلىق كورسەتكىشتەردى قولدانبايتىن بولادى. ءبىر دە ءبىر سيفر جوق، تەك شىنايى ءىس، حالىقتى تولعاندىرعان پروبلەمالاردىڭ شەشىمى، شىعىننىڭ الدىن الۋ»، - دەدى ولجاس بەكتەنوۆ ۆەدومستۆونىڭ القا وتىرىسىندا.
ونىڭ پايىمىنشا، مۇنداي جاڭا ءادىس سىبايلاس جەمقورلىققا قارسى ءىس- قيمىل تيىمدىلىگىن ايتارلىقتاي ارتتىرۋعا مۇمكىندىك بەرەدى.
«القا وتىرىسىمىزدان بۇقارالىق اقپارات قۇرالدارى حابار تاراتاتىن بولعاندىقتان بارلىق ازاماتقا ۇندەۋ جاساپ، جەمقورلىققا قارسى قىزمەتتىڭ جەكە قۇرامى ەلىمىزدىڭ الەۋمەتتىك- ەكونوميكالىق دامۋىنا جەمقورلىقتىڭ تەرىس اسەرىن تومەندەتۋ، مەملەكەتتىڭ ەكونوميكاعا سالعان قاراجاتىنىڭ سوڭعى الۋشىعا دەيىن جەتىپ، قازاقستاندىقتاردىڭ ءومىر ساپاسىن ارتتىرۋعا قىزمەت ەتۋى ءۇشىن بۇكىل كۇش- جىگەرىن جۇمسايتىنىنا سەندىرگىم كەلەدى»، - دەدى اگەنتتىك باسشىسى.
اۆتور: ەسىمجان ناقتىباي