ەيفەل مۇناراسى قيراپ قالعالى تۇر

نۇر- سۇلتان. قازاقپارات - پاريجدىڭ باستى نىشانى سانالاتىن ەيفەل مۇناراسى قيراۋدىڭ از الدىندا تۇر. تەكسەرۋ جۇرگىزگەن جەرگىلىكتى «مارياننا» باسىلىمىنىڭ تىلشىلەرى وسىلاي دەيدى.

ايتۋلارىنشا، وعان مۇنارا مەتالىنىڭ ءبۇلىنۋى سەبەپ. تاريحى 130 جىلدان اساتىن نىساندا قازىر وسىمەن 20-رەت بوياۋ جۇمىستارى ءجۇرىپ جاتىر. ويتكەنى 2 جىلدان كەيىن قالادا جازعى وليمپيادا ويىندارى وتەدى.

ءبىراق بۇل جولعى بوياۋ جۇمىستارى ۇزاققا سوزىلىپ كەتكەن. ولاردىڭ جالعاسىپ جاتقانىنا 3 جىل بولدى. ويتكەنى مەتالدىڭ بەتىنەن قورعاسىن تابىلىپ، زالالسىزداندىرۋ شارالارىن جۇرگىزۋگە تۋرا كەلدى. سونىڭ سالدارىنان قالپىنا كەلتىرۋ جۇمىستارىنىڭ قۇنى رەكوردتىق 84 ميلليون دوللارعا جەتكەن. ونسىز دا پاندەميا كەسىرىنەن مۇناراعا قىزمەت كورسەتۋگە قاجەتتى قارجى تاپشىلىعى تۋىنداعان ەدى. ويتكەنى شەتەلدىك تۋريستەر ازايعان. الايدا شەكتەۋ شارالارى الىنىپ تاستاعالى پاريجدىڭ باستى نىشانى بۇرىنعىداي كۇنىنە 20 مىڭ ساياحاتشىنى قابىلداپ جاتىر.

بليتس:

- تۋريستەردىڭ كوبى پاريجگە ەيفەل مۇناراسىن كورۋ ءۇشىن كەلەدى. سوندىقتان بۇل نىسان قيراۋى مۇمكىن دەگەن اقپارات تەك جەرگىلىكتى تۇرعىنداردىڭ عانا ەمەس، شەتەلدىكتەردىڭ دە كوڭىلىنە قاياۋ تۇسىرەرى انىق.

- پاريجدى ەيفەل مۇناراسىنسىز ەلەستەتۋ مۇمكىن ەمەس. الايدا تۋريستىك نىسان اكىمشىلىگىنىڭ وكىلدەرى «مۇنارا قيراۋعا جاقىن قالدى» دەپ تىلشىلەردىڭ اسىرا سىلتەپ وتىرعانىن ايتادى. باسشىلىق مەتالدىڭ ءبۇلىنۋ پروبلەماسى بارىن جاسىرمايدى. الايدا بۇل مۇنارانىڭ قوسىمشا قۇرىلىمدارىنا قاتىستى ەكەنىن ايتادى.

www.24.kz

***

ەيفەل مۇناراسى - پاريجدىڭ بۇل نىشانى ۋاقىتشا عيمارات رەتىندە، 1889 -جىلعى الەمدىك كورمەنىڭ كىرەبەرىس داربازاسى قىزمەتىن اتقارۋ ءۇشىن جوبالانىپ، سالىنعان بولاتىن. ول بۇگىندە فرانسيانىڭ سيمۆولىنا عانا اينالىپ قويماي، جىلىنا 53 ميلليون ەۋرو اكەلەتىن ۇلكەن تابىس كوزىنە اينالدى.

ەيفەل مۇناراسىن مارس الاڭىندا قۇراستىرۋعا ەكى جىلدان استام ۋاقىت كەتكەن. سول كەزدەگى ەڭ بيىك دەپ سانالعان حەوپس پيراميداسى (137 م)، كەلن شىركەۋى جانە ۋلم شىركەۋىنەن (167 م) ەكى ەسە بيىك بولعان.

فرانسيانىڭ سيمۆولىنا اينالعان ەيفەل مۇناراسىنىڭ بيىكتىگى - ونىڭ قۇزار باسىنداعى انتەنناسىمەن قوسا ەسەپتەگەندە 322 مەتر. ال سالماعى ون مىڭ توننا. الىپ مۇنارا ءۇش بولىكتەن تۇرادى. ەڭ ۇستىندە ورنالاسقان ءۇشىنشى ءبولىم 274 مەتر بيىكتىكتە ورنالاسقان. ونىڭ توبەسىنە نە ليفتىمەن، نە 1792 باسپالداقپەن جاياۋ كوتەرىلۋگە بولادى.

كەزىندە گيتلەر فرانتسيانى باسىپ العاننان كەيىن ەيفەل مۇناراسىنا شىعۋعا كەلەدى. سول كەزدە ليفتى ىستەمەي قالىپ، ول 1792 باسپالداقپەن جاياۋ كوتەرىلگەن دەگەن اڭىز بار.

مۇنارانى ءبىر مەزگىلدە 10,400 ادام ارالاي الادى. وعان جىلىنا 6 ميلليون ادام كوتەرىلەدى.

الىپ مۇنارا فرانسۋزداردىڭ تۋىنداي ۇشكە بولىنگەن. العاشىندا ونىڭ ءبىرىنشى قاباتىندا مەيرامحاناعا قاجەت بولمەلەر، ەكىنشى قاباتىندا ليفتىنى كوتەرۋگە ارنالعان سۋ قويماسى مەن اينەك گالەرەياسىنداعى مەيرامحانالار ورنالاسادى. ال ءۇشىنشى قاباتىندا استرونوميالىق جانە مەتەورولوگيالىق وبسەرۆاتوريا جانە فيزيكا كابينەتى بولعان.

ەيفەل مۇناراسىنىڭ ءبىرىنشى بولىگى - 57 م بيىكتىكتە، ەكىنشى بولىگى - 115 م، ال ءۇشىنشىسى - 274 م بيىكتىكتە ورنالاسقان. بۇگىندە ونىڭ ءاربىر قاباتىندا بارلار مەن مەيرامحانالار جانە باقىلاۋ الاڭدارى بار. ونىڭ ەڭ ۇستىڭگى قاباتىندا ماياك ورنالاسقان. وعان تۇسكەن پروجەكتورلاردىڭ جارىعى 70 شاقىرىم جەردەن كورىنىپ تۇرادى. مۇنارا باسىندا فيزيكتەر جەردىڭ تارتىلىس كۇشىنىڭ پرينتسيپتەرىن زەرتتەگەن، تەڭىزشىلەر ۋاقىتتى ايىرعان. ونىڭ توبەسىنەن 140 شاقىرىمعا دەيىنگى ايماقتى شولۋعا بولادى.