شەتەلدە تۇراتىن قازاق بالالارى اراسىندا وليمپيادا ءوتتى

تۇركىستان. قازاقپارات - قانداس وقۋشىلار اراسىنداعى قازاق ءتىلى مەن ادەبيەتى وليمپياداسىنىڭ جەڭىمپازدارى انىقتالدى، دەپ حابارلايدى قازاقپارات.

تۇركىستاندا قازاق دياسپوراسىنىڭ بالالارىنا ارنالعان «قازاقستان - اتا جۇرتىم، قاسيەتىم - انا ءتىلىم» اتتى قازاق ءتىلى مەن ادەبيەتى ءپانى بويىنشا ⅩⅨ حالىقارالىق وليمپيادا ءوز مارەسىنە جەتتى.

26 -ماۋسىم مەن 1- شىلدە ارالىعىندا وتكەن جارىسقا يران، قىرعىزستان، وزبەكستان، موڭعوليا جانە رەسەي فەدەراتسياسىندا تۇراتىن 67 وقۋشى قاتىستى. وليمپيادانىڭ ءبىرىنشى كۇنى ءبىلىمپازدار «اباي - ىزگى قاسيەتتەردىڭ جوقتاۋشىسى»، «ۇلى تۇلعا - ۇلت ۇستازى» (احمەت بايتۇرسىن ۇلىنىڭ 150 جىلدىعىنا وراي)، «ءاليحان بوكەيحان - ۇلت مۇددەسىنىڭ جاناشىرى»، «مەنىڭ تاڭداعان ماماندىعىم»، «مەنىڭ قازاقستانىم» سياقتى تاقىرىپتاردا ەسسە جازدى.

ەكىنشى كۇنى وقۋشىلار قازاق ءتىلى مەن ادەبيەتىنەن ءبىلىمىن، شەشەندىك ونەرى مەن حالىق اۋىز ادەبيەتى شىعارمالارىن ورىنداۋ شەبەرلىگىن كورسەتتى. سونىمەن قاتار ءادىلقازى القاسىنىڭ الدىندا زەرتتەۋ جۇمىسىن قورعادى. مادەني باعدارلامانىڭ شەڭبەرىندە قاتىسۋشىلار ارىستان باب، قوجا احمەت ياسساۋي كەسەنەسىنە تاعزىم ەتىپ، وتىرار مۇراجايى مەن «ۇلى دالا ەلى» ورتالىعىن تاماشالادى. سونىمەن قاتار وقۋشىلار ق. ا. ياسساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ عالىمدارىمەن كەزدەسىپ، مازمۇندى اڭگىمە قوزعادى.

ەسكە سالا كەتەيىك، وليمپيادا شەتتەگى قازاق دارىندى بالالارىن انىقتاۋ جانە ولاردىڭ تىلگە، ادەبيەتكە، تاريحقا ىنتالاندىرۋ جانە قازاق حالقىنىڭ مادەنيەتىنە دەگەن قىزىعۋشىلىقتى ارتتىرۋ ماقساتىندا ۇيىمداستىرىلدى. بارلىق جەڭىمپازدار مەن جۇلدەگەرلەر ق ر وقۋ- اعارتۋ مينيسترلىگىنىڭ 1، II جانە III دارەجەلى ديپلومدارىمەن، سونداي- اق التىن، كۇمىس جانە قولا مەدالدارمەن ماراپاتتالدى.

ال ۇزدىك دەپ تانىلعاندار «وتانداستار قورىنىڭ» بۋراباي ۇلتتىق كۋرورتتىق- تابيعي اۋماعىندا IQanat مەكتەبى بازاسىندا وتەتىن جازعى دەمالىسقا 3 تەگىن جولداما جەڭىپ الدى.

اۆتور: جانات قاپالبايەۆا